Aıaqtalmaǵan jóndeý úshin 6,5 mln teńge aýdarǵan aýyl ákimi tártiptik jazaǵa tartyldy

ORAL. KAZINFORM — Qaratóbe aýdany Egindikól aýyldyq okrýginiń ákimi memlekettik qyzmetke kir keltiretin tártip buzýshylyq jasaǵany úshin tártiptik jaýapkershilikke tartyldy. Bul týraly Batys Qazaqstan oblysynyń prokýratýrasy habarlady.

Qaratóbe aýdany prokýratýrasy buqaralyq sportty damytýǵa baǵyttalǵan sharalar aıasynda júrgizilgen tekserý barysynda 6,5 mıllıon teńgeden astam somanyń negizsiz aýdarylǵanyn anyqtady. Atap aıtqanda, 2024 jylǵy 14 qarashada quny 6 599 900 teńge bolatyn shaǵyn fýtbol alańyn aǵymdaǵy jóndeý jumystary aıaqtalmaǵanyna qaramastan, ákimdik atqarylǵan jumystar aktisine qol qoıǵan.

Prokýratýra foto jáne beıne materıaldar arqyly obektini kózben sholyp qaraý kezinde birqatar jumys túrleri oryndalmaǵanyn anyqtady. Máselen:

• orama jabyn tóselmegen,

• qoqys jáshikteri men oryndyqtar ornatylmaǵan,

• jaryq shamdary joq,

• qorshaý jumystary tolyq aıaqtalmaǵan.

Tekserý nátıjesinde prokýrorlyq qadaǵalaý aktisi engizilip, aýdan ákimdigi merdiger uıymnan barlyq jumystardy smetalyq qujattamaǵa sáıkes tolyq oryndaýdy talap etti.

Sonymen qatar, Memlekettik qyzmet isteri agenttiginiń Ádep jónindegi keńesi aýyl ákimine qyzmetine tolyq sáıkes emestigi týraly eskertý berdi.

Buǵan deıin habarlanǵandaı, Batys Qazaqstanda sot sheshimimen jer daýyna núkte qoıylǵan edi.