Aıaqtalmaǵan ister boıynsha sýdıanyń suhbat berýi sot etıkasyna jat qylyq - E.Qasymbekov
ALMATY. Jeltoqsannyń 11-i. QazAqparat /Ádilet Musahaev/ - Sottyń sheshimi - zańdyq qana emes, ǵylymı negizdi ári ashyq bolǵanda ǵana halyq tarapynan «sotqa» degen senim týady. Almaty qalalyq sotynyń sýdıasy Ernar Qasymbekov osyndaı pikir bildirdi,
dep habarlaıdy QazAqparat.
Onyń aıtýynsha, sot shyǵarǵan úkimder, zańdy kúshine engen sheshimderdi buqaralyq aqparat quraldarynda keńinen jarııalaǵan jón. «Іster ashyq sot májilisinde qaralǵan kezde taraptar aýdıojazba qoldanýǵa quqyly. Sondaı-aq taraptar qarsy bolmasa, beınejazý quraldaryn qoldana alady. Birqatar ister boıynsha ashyqtyq qaǵıdasyn shekteý zańmen kórsetilgen. Máselen, bala asyrap alý isteri boıynsha bala asyrap alý qupııasy saqtalýy úshin osyndaı ister jabyq sot májilisinde qaralady», deıdi sýdıa.
Sonymen qatar ol ár sýdıanyń ózi qaraǵan isi boıynsha kez kelgen jýrnalıske suhbat berýi kerektigin jetkizdi. «Sýdıanyń aıtqany zańnyń jańǵyrǵanymen para-par. Al berilgen suhbat qoǵamǵa tek ıgi jaǵynan ǵana jetkizilýi úshin biz tilshilermen únemi yntymaqtasyp jumys jasaýymyz qajet», deıdi E. Qasymbekov. Alaıda sýdıa tilshiniń kásibı etıkasyna jáne zańnama talabyna sáıkes qaralyp, sheshimin tappaǵan ister boıynsha qandaı da bolsyn pikir bildirýine bolmaıtyndyǵyn aıtady. «Aıaqtalmaǵan ister boıynsha sýdıanyń suhbat berýi sot etıkasyna jat qylyq. Osy jaǵyn tilshiler eskerer bolsa, tıisti isti qarap otyrǵan sýdıaǵa da eshqandaı yqpal bolmaıdy. Bul baǵytta qoǵamda teris pikir qalyptastyratyn sebepter týǵyzylmaýy kerek», deıdi ol.
