Aıaq kıimge smartfon jasyryp, UBT-ǵa kirmek bolǵan talapker anyqtaldy
ASTANA. KAZINFORM — Ulttyq testileý ortalyǵy bıylǵy UBT kezinde talapkerlerdiń tyıym salynǵan zattardy alyp ótýdiń túrli amalyn qoldanǵanyn aıtty.
Ulttyq testileý ortalyǵy dırektorynyń orynbasary Naýjan Dıdarbekovanyń aıtýynsha, talapkerler jyl saıyn smartfon men ózge de tyıym salynǵan zattardy jasyrýdyń jańa tásilderin oılap tabady.
— Bıyl smart-kózildirikpen testileýge kirýge áreket jasaldy. Sondaı-aq telefondy shashqa arnalǵan rezeńkeniń ishine jasyryp ákelmek bolǵandar da kezdesti. Erekshe jaǵdaılardyń biri — boıy alasa talapkerdiń 43 ólshemdi aıaq kıimmen kelýi boldy. Tekserý barysynda aıaq kıimniń ishine smartfon jasyrylǵany anyqtaldy, — dedi ol Ortalyq kommýnıkatsııalar qyzmetinde ótken brıfıngte.
Ulttyq testileý ortalyǵy talapkerlerdi akademııalyq adaldyq qaǵıdalaryn saqtap, testileýge tyıym salynǵan zattardy alyp kelmeýge shaqyrdy.
Eske salaıyq, 2026 jylǵy negizgi UBT 10 mamyr men 10 shilde aralyǵynda ótti. Osy kezeńde testileýge 233 myń talapker qatysyp, eki múmkindik aıasynda emtıhan 422 myń ret tapsyryldy.
UBT barysynda 890 quqyq buzýshylyq anyqtaldy. Sonyń ishinde smartfon, shpargalka jáne ózge de tyıym salynǵan zattardy alyp ótpek bolǵan 522 talapker test tapsyrý múmkindiginen aıyryldy.
