Aıaq kıim ımporttaýshylar salyqtan jaltarý úshin ónimdi bólshektep kirgizýi múmkin - JAP

ASTANA. KAZINFORM – Joǵary aýdıtorlyq palata mamandary elde aıaq kıim ımportynyń salyqtan jaltarý qaýpi óskenin málim etti.

Aýdıtorlardyń sózinshe, Qazaqstan Eýrazııalyq ekonomıkalyq odaq elderi arasynda tańbalanatyn taýarlardyń sany jaǵynan artta qalyp otyr. Bul elge odaqtas memleketterdiń shekarasy arqyly kiretin kontrabandalyq taýardyń kólemi kóp degen sóz.

- Respýblıkada áli kúnge deıin qandaı taýarlardy birinshi kezekte tańbalaý qajet ekenin kórsetetin bekitilgen ádisteme joq. Mysaly, 5 jyl buryn temeki ónimderin tańbalaý engizildi, alaıda 2024 jyly kontrabandalyq temeki ónimderiniń 16 mln astam qaptamasy tárkilengen. Bul 3 jyl burynǵy kórsetkishten 4,5 ese kóp, - dep jazylǵan palatanyń baspasóz qyzmeti taratqan málimette.

Elge syrttan kiretin aıaq kıim ımporty 4 jyl ishinde tómendegenimen ony jasaýǵa arnalǵan daıyndamalar ımporty 13 ese ósken. Basqasha aıtsaq, salyqtan jaltarý úshin aıaq kıimdi syrttan el aýmaǵyna daıyndamalar kúıinde kirgizip, el aýmaǵynda daıyn ónim retinde satý beleń aldy degen kúmán bar.

- Óndiris kólemi az bola tura aıaq kıimge arnalǵan daıyndamalar ımportynyń jyl saıyn artýy kedendik bajdardy tóleýden jaltarý úshin daıyn aıaq kıimdi daıyndamalar retinde ákelý faktileriniń bolýy múmkin ekenin kórsetedi, - delingen JAP málimetinde.

Buǵan deıin májilis tórinde keden qyzmetiniń qadaǵalaý fýnktsııasyn keńeıtýge Bas prokýratýra qarsy bolyp otyrǵany aıtylǵan edi.