Aıaǵynan ustap úlgerdi: Qostanaılyq stýdent terezeden qulaǵan balany qutqardy
QOSTANAI. QazAqparat – Qostanaı oblysynyń Jitiqara qalasynda stýdent jigit kópqabatty úıdiń terezesinen qulap ketken sábıdi qaǵyp aldy. QazAqparat bul týraly oblystyq Polıtsııa departamentiniń baspasóz qyzmetine silteme jasap habarlaıdy.
Oqıǵa jýyrda Jitiqara qalasynda bolǵan. Polıtsııaǵa qalanyń 7-inshi shaǵynaýdanyndaǵy úıdiń úshinshi qabatynan sábıdiń qulap ketkeni týraly habar túsken. Terezeden qulaǵan balany qala turǵyny Temirlan Ábdiǵalıev qutqaryp qalǵan.
«Sol kúni Temirlan qarsy turǵan úıdiń terezesinde shamamen úsh jasar sábıdiń turǵanyn kórgen. Ol oılanbastan kómekke júgirgen. Sálden soń sábı tómen qaraı qulap ketken. Abyroı bolǵanda Temirlan onyń aıaǵynan ustap úlgerdi», - deıdi polıtsııanyń baspasóz qyzmetiniń bas mamany Kenje Qonysbaı.
Temirlan Ábdiǵalıev bul jaǵdaıdy eshqashan umytpaıtynyn aıtty.
«Sábı qulaǵannan keıin maǵan shoshyna qaraǵan janaryn eshqashan umytpaspyn... Ol asfaltqa qulaǵanda jaǵdaıy qandaı bolatynyn elestetýdiń ózi qorqynyshty», - dep eske aldy jas jigit.
Aýdandyq polıtsııa bólimi Temirlannyń batyl áreketin eskerýsiz qaldyrǵan joq. Jitiqara aýdandyq polıtsııa bóliminiń bastyǵy Bolat Imanov stýdent jigittiń anasy Anar Shakýrovaǵa alǵys hat tabys etip, ulyna belsendi azamattyq ustanymy jáne adam ómirin qutqarý kezinde kórsetken erligi úshin alǵys bildirdi.
Qazir Temirlan Aqtóbe qalasynda. Ol medıtsınalyq kolledjdiń úshinshi kýrsynda oqıdy.
