Aıaǵynan aıyrylǵan qazaqstandyq bıshi týraly fılm jaryqqa shyqty
ALMATY. QazAqparat - Aıaǵynan aıyrylǵan qazaqstandyq bıshi týraly fılm jaryqqa shyqty. Derekti kartınany alǵashqy bolyp almatylyqtar «Go Viral» festıvali aıasynda tamashalady.
Qanat Beısekeevtiń «Men bılegim keledi» kartınasynyń prototıpi - almatylyq Dmıtrıı Kım.
Týyndy bıshiniń ómirbaıanyna negizdelip túsirilgen.
Belgili ónerpaz Dmıtrıı Kım sheteldi baǵyndyrý josparyn Reseıden bastaıdy. Keıin Amerıkaǵa sapar shegedi.
Amerıkada óziniń talantynyń arqasynda tanylyp, endi kelisimderge qol qoıýǵa bolady dep júrgende qaıǵyly jaǵdaıǵa dýshar bolady. Saldarynan jas jigit bir aıaǵynan aırylyp qalady.
«Bul jumysym aldyńǵylardan góri ózgeshe. Men Dıma týraly bıyl naýryzda bildim. Dostarym Facebook paraqshasyndaǵy posttaryn maǵan jiberip turatyn. Onyń oqıǵasymen muqııat tanysqan soń qalyń oıǵa battym. Erteńine Los-Andjeleske bılet alyp, Dımamen kezdestim. Ekeýmiz birge jumys isteı bastadyq. Keıin men Almatyǵa kettim. 2 aıdan soń qaıtyp bardym. Dmıtrıı osy az ǵana ýaqyt aralyǵynda adam sengisiz nátıjelerge qol jetkizgenin kórdim», - dedi rejısser Qanat Beısekeev.
Qanattyń aıtýynsha, alǵashynda Dmıtrıı óziniń qandaı qıyn jaǵdaıdy basynan keshkeni týraly kóp aıtqysy kelmeıtin.
«Monologty birinshi dýblden jazýymyzdy ótinetin. Men túsinistikpen qaradym. Kez kelgen adam ótkenin aıtqysy kelmeıdi. Fılm túsirilimi barysynda ekeýmiz dostasyp kettik», - dedi ol.
Derekti fılmniń uzaqtyǵy 15 mınýt. Montajdaý jumystary Almatydaǵy premera bolatyn kúni tańerteń aıaqtalǵan.
Jaqyn arada Los-Andjelestegi orys tildi aýdıtorııaǵa kórsetiledi. Olardyń arasynda alǵash ret bas keıipkerdiń ózi tamashalaıtyn bolady. Youtube arnasyna 1 aıdan soń ornalastyrylady.
«Osyndaı oqıǵalar kóp adamdy qaıyrymdylyqqa úndeıtini sózsiz. Basyńa ne tússe de qoǵamnyń aıaýshylyǵyna turmaıtyn nárse ekenin túsiný kerek. Dımanyń tarıhy - ǵajap dúnıe. Onyń ómirge degen qushtarlyǵy, kúreskerligi meni tánti etti», - dedi Qanat Beısekeev.
Bolashaqta kınorejısser aýyl mektebi týraly fılm túsirýdi josparlap otyr.
«Tolyq metrajdy fılm túsirýge qulqym joq. Meni tek otandastarymnyń sheteldegi jetistikteri qyzyqtyrady. Olar sheteldik bolsa da kóp jetistikke jetip jatyr. Bul olardyń patrıottyq sezimi», - dedi rejısser.
