Aıaǵyna 11 ret aýyr ota jasalǵan oıynshy úlken fýtbolǵa oraldy
ASTANA. QazAqparat - Eýropanyń eki dúrkin chempıony, ıspanııalyq Santı Kasorla bir jarym jyldyq úzilisten soń úlken fýtbolǵa qaıta oraldy. Ol jańa maýsymda «Vılıarreal» klýbynda óner kórsetedi, dep habarlaıdy QazAqparat tilshisi klýbtyń saıtyna silteme jasap.
33 jastaǵy fýtbolshysońǵy ret 2016 jylǵy 19 qazanda fýtbol oınaǵan. Soǵan qaramastan «Vılıarreal» fýtbolshyǵa taǵy da senim artyp otyr. Kasorla bul komandanyń sapynda 2003-2011 jyldar aralyǵynda óner kórsetken.
Jalpy, fýtbolshynyń kásipqoı mansabyna jaraqat kóp kedergi keltirdi. Alǵash ret 2013 jyly Jenevada Chılıge qarsy ótken joldastyq kezdesýde Ispanııa sapynda alańǵa shyqqan Kasorla tobyǵynan jaraqat alady. Ókinishke qaraı sol jaraqatynan tolyq aıyǵa almaı qoıady. Londonnyń «Arsenal» klýby sapynda aıaǵynyń syzdap aýyrǵanyna qaramastan joǵary deńgeıde oıyn kórsetip júrdi. Alaıda birneshe jylda sol aıaq tizesiniń aıqysh baılamyna, oń aıaǵynyń Ahıll sińirine birneshe ret jasalǵan kúrdeli otalardan soń Kasorla fýtboldan birjolata qol úzip qaldy.
Uzaq ýaqyt tolarsaǵyndaǵy ota jasalǵan jer jazylmaǵan soń, Kasorla Ispanııaǵa, doktor Mıkel Sancheske bardy. Salamanka qalasynda júrgizilgen zertteýler kezinde Ahıll sińirine ınfektsııa túsip, sińirdiń 8 santımetrin jemirip tastaǵany belgili bolady.
Ondaı jaraqatpen fýtbol oınamaq túgil, jer basyp júrý múmkin emes edi. Abyroı bolǵanda, sińiriniń ózine 8 ret kúrdeli ota jasatyp, birneshe ret qatarynan antıbıotık kýrstaryn qabyldaý arqyly ınfektsııadan da, jaraqatynan da qutylady. Al jaranyń ashyq qalǵan aýzyn jamaý úshin deneniń basqa jerinen teri kesip alyp japsyrýǵa týra keledi. Dárigerler ol terini fýtbolshynyń qolynan - qyzy Indııanyń esimi jazylǵan jerinen kesip alady. Bul - Kasorlaǵa jasalǵan sońǵy ota boldy. Marca basylymyna bergen suhbatynda Santı fýtboldan eshqashan úmit úzbeıtinin, bul jaraqattar jolyn bógeı almaıtynyn málim etti.
Byltyrdan beri Kasorla taǵy da joǵary deńgeıde dop tebý úshin baryn salyp jattyǵyp keledi. Jigeri myqty fýtbolshy jattyǵýlardyń barysyn áleýmettik jelide jankúıerlerimen de bólisip otyrady.
Sportshy búgin Týıtterdegi paraqshasynda «Vılıarreal» sapynda ótkizgen oıyndarynyń vıdeosynan úzindiler jarııalap, sol jetistikterin qaıtalaýǵa úmit artatynyn bildirdi.
Good news coming! pic.twitter.com/bMdWQtD5L8
— Santi Cazorla (@19SCazorla) 5 ııýnıa 2018 g.
