Aıagózdegi tórt balanyń ólimi: Áleýmettik ortalyqtarǵa tekserý júrgizilmek

ÓSKEMEN. QazAqparat – QR Eńbek jáne halyqty áleýmettik qorǵaý mınıstrligi 113 medıtsınalyq-áleýmettik mekemege jiti tekserý júrgizý jaıly bastama kóterdi. Jospardan tys tekserýge Aıagózdegi arnaıy áleýmettik kómek ortalyǵynda tórt tárbıelenýshiniń kóz jumýy sebep bolyp otyr, dep habarlaıdy QazAqparat tilshisi.

Mınıstrliktiń baspasóz qyzmeti usynǵan málimetke súıensek, birinshi kezekte tirek-qımyl apparaty buzylǵan balalardy ońaltatyn arnaıy áleýmettik qyzmet kórsetý ortalyqtaryna, sondaı-aq psıhonevrologııalyq aýrýlary bar balalarǵa arnalǵan ortalyqtarǵa tekserý júrgizilmek. Tekserý medıtsınalyq-áleýmettik qyzmetterdi kórsetýge qoıylatyn barlyq talaptardyń saqtalýyna jáne sol mekemelerdegi balalardyń turmystyq jaǵdaıyna baılanysty bolady.

Búginde Qazaqstanda múgedek balalarǵa arnalǵan 20 memlekettik ońaltý ortalyǵy jumys isteıdi, onda 1,8 myńnan astam bala turyp jatyr.

Barlyq 113 medıtsınalyq-áleýmettik mekemede keshendi tekserý júrgizilmek. onyń ishinde:

178 adam qamtylǵan 4 tirek-qımyl apparaty buzylǵan balalarǵa áleýmettik qyzmet kórsetý ortalyǵy;

168 adamdy qamtıtyn psıhologııalyq patologııasy bar balalarǵa arnalǵan 16 áleýmettik qyzmet kórsetý ortalyǵy;

8 364 adam turyp jatqan qarttar men múgedekterge arnalǵan 45 áleýmettik qyzmet kórsetý ortalyǵy;

14 160 adamǵa arnalǵan 48 psıhonevrologııalyq áleýmettik qyzmet kórsetý ortalyǵy bar.

Jalpy áleýmettik qyzmet kórsetý ortalyqtarynda 24 myńnan astam adam turýda. Atalmysh mekemeler jergilikti atqarýshy organdardyń qaramaǵynda.

Esterińizge sala ketsek, osyǵan deıin Aıagózdegi áleýmettik kómek ortalyǵynda 4 balanyń qaıtys bolǵandyǵy jaıly habarlanǵan.