Aıagózdegi kardıologııalyq ortalyqtyń qurylysy jazdyń basynda aıaqtalady – ShQO
ÓSKEMEN. QazAqparat – Shyǵys Qazaqstan oblysy Aıagóz aýdanynda boı kóteretin kardıologııalyq ortalyqtyń qurylysy jazdyń basynda aıaqtalmaq, dep habarlaıdy QazAqparat tilshisi.
Barlyq standartqa sáıkes keletin kardıologııalyq ortalyq oblystyq klınıkadan esh kem emes. Munda aıagózdikterden bólek, Úrjar, Jarma, Tarbaǵataı aýdandarynyń turǵyndaryna da medıtsınalyq kómek kórsetiledi. Atalmysh nysannyń qurylys jumystarymen oblys ákimi Danıal Ahmetov jumys sapary barysynda tanysyp qaıtty.
Kardıologııalyq ortalyq aýdandyq aýrýhana negizinde salynýda. Aýrýhananyń bas dárigeri Shalqar Omarovtyń aıtýynsha, bul ortalyqty salý qajettiligi buryn týyndaǵan. Osyǵan deıin ótkir nemese jedel kardıologııalyq patologııasy bar naýqastardyń deni Semeı, Óskemen, Nur-Sultan jáne Almatydaǵy kardıologııalyq klınıkalarǵa em qabyldaýǵa jiberiletin.
Aıagózdegi kardıologııalyq ortalyqqa jóndeý jumystaryn júrgizý týraly kelisim osy jyldyń 20 aqpanynda jasalǵan. Búginde mundaǵy jóndeý jumystarynyń 60 paıyzy aıaqtaldy. 1 maýsymǵa deıin nysandaǵy qurylys-montajdaý jumystary aıaqtalady dep josparlanyp otyr.
– Barlyq qajetti quraldar satyp alyndy. 15 mamyrǵa deıin medıtsınalyq rentgen-angıografııalyq apparaty ornatylady. Munda kompıýterlik tomografııa bar. Aıta ketetin bir jaıt, aýrýhanada ottegimen qamtamasyz etý oń jolǵa qoıylǵan. Munda ótkir nemese jedel kardıologııalyq patologııasy bar naýqastar emdeletin bolady. Bizde ınsýlt ortalyǵy nátıjeli jumys istep tur. Eki jyldyń ishinde 1 870 adamdy emdep, 970 adamdy ońaltýdan ótkizdik, - dedi Shalqar Omarov.
Aımaq basshysy Danıal Ahmetov qurylys jumystaryna oń baǵasyn berdi. Sondaı-aq ol aýdandyq ortalyq aýrýhanadaǵy ótken jyly medıtsınalyq qyzmet kórsetý boıynsha ІІІ deńgeıge ótken bosaný bólimshesine bardy.
– Bul aýyldaǵy medıtsınanyń jańa deńgeıi. Jýyq arada munda anıograf qoıylady. Sonda Aıagózdegi aýdandyq aýrýhananyń qyzmet kórsetý deńgeıi Óskemen men Semeıden esh kem bolmaıdy. Búginde osy aýrýhanada jumys isteıtin 15 dáriger Eýropaǵa baryp, biliktilikterin arttyryp qaıtty. Bul alǵa jyljýdyń naqty kórinisi, - dedi Danıal Ahmetov.
Sapar sońynda oblys ákimi bes qabatty turǵyn úıdiń qurylys jumysymen tanysty. Bıylǵy 15 maýsymda 60 páterli kópqabatty turǵyn úı qoldanysqa berilmek.
