Aıagózdegi áskerı qalashyqta 60 páterli úı paıdalanýǵa berildi

AıAGÓZ. QazAqparat - Aıagóz garnızonynyń «Ońtústik» áskerı qalashyǵynda 60 páterli úı paıdalanýǵa berildi, dep habarlaıdy QazAqparat Qorǵanys mınıstrligine silteme jasap.

Vedomstvo baspasóz qyzmetiniń habarlaýynsha, Aıagóz garnızonynyń áskerı qyzmetshileri men otbasy múshelerine «Ońtústik» áskerı qalashyǵynda jóndeýden ótken 60 páterdiń kilti saltanatty túrde tabys etilgen. Bul áskerı qyzmetshilerdiń turǵyn úı máselesin sheshýge, olarǵa áskerı qyzmetti atqarý úshin qajetti jaǵdaımen qamtamasyz etýge múmkindik berdi.

«Jańa páterlerge tolyqtaı ishki árleý jasalǵan. Onda elektr plıtasy, sý jylytqysh jáne kıim-keshek shkaby qoıylǵan. Órt dabyly qosylyp, elektr energııasy men sý eseptegish quraly ornatylǵan. Úı otqa tózimdi materıalmen qaptalǵan. Aýlaǵa asfalt tóselip, onda balalar oıyn alańy men jattyqtyrý quraldary ornatylǵan sport alańy jabdyqtalǵan», delingen habarlamada.

Áskerı qalashyqtyń kóptegen turǵyn úı ǵımarattary ótken ǵasyrdyń 70-90 jyldary salynǵan. Kúrdeli jóndeý nátıjesinde barlyq úı jańa keıipke ıe bolyp, ómir súrýge qolaıly ári jaıly qalypqa endi.