Aıagózdegi apattyń shyǵyny eseptelip jatyr - ShQO
ÓSKEMEN. QazAqparat - Aıagózdegi tótenshe jaǵdaıǵa baılanysty qurylǵan shtab 4 topqa bólinip, apat shyǵyndaryn aldyn ala esepteýge kirisip ketti, dep habarlaıdy QazAqparat tilshisi.
Jergilikti jurt qalanyń sý basqan bóligin temirjol jelisinen syrtta jatqandyqtan «Zalınıı» dep ataıdy. Aıagózdiń tórt birdeı aımaǵyna jaıylǵan sý keshe saǵat 19.00-den bastap saıabyrsyǵan bolatyn. Búgin sý múlde qaıtqan. Kún sýyǵandyqtan, kósheler muz kesekteri men toń batpaqqa tolyp ketken. Jergilikti shtab úı-úıdi aralap zardap shekken otbasylardy tirkeýge alýdy bastap ketipti.
«Shtab músheleri tórt topqa bólinip, úılerdi aralap júrmiz. Aldyn ala túsken málimetter boıynsha 100 úıge sý kirgen, 8 úıdiń turýǵa jaramsyz bolyp búlingeni anyqtaldy. Áli aralaıtyn úıler kóp, qorytyndy shyǵarýǵa erte» - deıdi aýdandyq tótenshe jaǵdaılar basqarmasynyń basshysy Janat Qalıev.
Onyń aıtýynsha, keshe bir adam dárigerdiń kómegine júgingen. Sý basqan aýdanda jedel járdem kóligi turǵanymen, búginshe onyń qyzmetine eshkim júginbegen. Internatqa ornalastyrylǵan eresekter men 28 balaǵa aýdandyq bilim berý bólimi ystyq tamaq úlestirip, qyzmet kórsetýde. Óskemennen jetken kómek jasaǵynyń psıhology turǵyndarǵa moraldyq kómek kórsetýde.
Qala jastary erikti top quryp apattan zardap shekken adamdarǵa jedel kómek uıymdastyryp júr. Olar komıssııanyń kelýin kútip, úıin torýyldap júrgenderge tamaq úlestirýde.
«Eriktilerdiń sany 100-den asady. Meniń qasymda 30-daı erikti júr. Jergilikti kásipker Murat Eshenǵazıev túski as ýaqytynda 60 portsııa palaý, 30 lıtr ystyq shaı, 100 danadan astam bálish ákeldi. Osy adam kesheden beri elge qyzmet etip júr. Sý qaıtqanmen, kóshede tek jol talǵamaıtyn kólikter júre alady. Murat Eshenǵazıev turǵyndardy baratyn jerine óz kóligimen tasyp júr» - deıdi erikti toptyń basshysy Shynar Sydyqova.
