Aıagózdegi Qozy Kórpesh-Baıan sulý kesenesine aparatyn joldaǵy kópir qırap tur
SEMEI. KAZINFORM – Qozy Kórpesh-Baıan sulý kesenesi Abaı oblysyndaǵy Aıagóz aýdanynda ornalasqan. Kesenege aparar joldaǵy kópir kóktemnen beri qırap tur.
Aıagóz aýdany Tarlaýly aýyldyq okrýgindegi Qozy Kórpesh-Baıan sulý kesenesine aparatyn jolda ornalasqan kópir 2014 jyly salynǵan. Merdiger - «ARDS» JShS. Bıylǵy kóktemgi sý tasqyny kezinde kópir qırap qaldy.
«Qazirgi tańda kópirge tehnıkalyq tekserý jumystary júrgizildi. Jóndeýdi qolǵa alý úshin jobalyq-smetalyq qujattama ázirlený ústinde. Kópirdi qalpyna keltirý maqsatynda tıisti jumystar júrgiziledi», - dep habarlady Aıagóz aýdandyq ishki saıasat, mádenıet, tilderdi damytý jáne sport bóliminen.
Kópirdi bólshekteý jumystary jergilikti atqarýshy organ kúshterimen iske asyrylmaq.
Aıta keteıik, Qozy kórpesh-Baıan sulý kesenesi – 10-11 ǵasyrlarda turǵyzylǵan sáýlet óneri eskertkishi. Kesene týraly alǵash ret akademık I.P. Falk 1771 jyly jazǵan.
Eske salsaq, osyǵan deıin «Semeı ormanyndaǵy» alapat órtten qaza bolǵan órt sóndirýshiler men ormanshylarǵa eskertkish ashylǵanyn habarlaǵan edik.
