Aıagózde «Jas tehnıkter stantsııasy» ashyldy
SEMEI. KAZINFORM – Búgin Aıagóz aýdanynda alǵash ret «Qazaqstan halqyna» qorynyń «JASAMPAZ URPAQ» jobasy aıasynda uıymdastyrylǵan «Digital Urpaq: Ayagoz 2026» aýqymdy tehnologııalyq jáne shyǵarmashylyq is-sharasy barysynda jańartylǵan «Jas tehnıkter stantsııasy» paıdalanýǵa berildi. Saltanatty is-sharaǵa oblys ákimi Berik Ýálı, «Qazaqstan halqyna» qoǵamdyq qorynyń Basqarma tóraıymy Lázzat Shyńǵysbaeva qatysty.
Joba aıasynda 13 úıirme jumys isteıdi. Onyń ishinde robototehnıka, avtomodeldeý, avıamodeldeý, alǵashqy tehnıkalyq úlgileý, sándik-qoldanbaly óner, tigin isi jáne sport týrızmi baǵyttary jańǵyrtylyp otyr. Sonymen qatar zaman talabyna saı 8 jańa úıirme ashylady. Atap aıtqanda, 3D-modeldeý jáne basyp shyǵarý, zymyran jasaý jáne ushqyshsyz ushý apparattary, foto jáne beınemontaj, vokal jáne dybys jazý, tehnıkalyq shyǵarmashylyq, qysh óneri jáne tsıfrlyq tehnologııalar. Bul baǵyttar balalardyń tyń ıdeıalaryn júzege asyrýǵa jol ashady.
Jobanyń negizgi maqsaty – balalar men jasóspirimderdiń ınjenerlik, tsıfrlyq jáne shyǵarmashylyq quzyretterin damytý. Aýyl jáne aýdan mektep oqýshylaryna zamanaýı tehnologııalardy meńgerýge múmkindik berý arqyly olardyń kásibı áleýetin ashý jáne bolashaqtyń suranysqa ıe mamandyqtaryna daıarlaý kózdelgen.
Ashylý rásiminde quttyqtaý sóz sóılegen aımaq basshysy jańa ortalyqtyń aýyl balalary úshin zor múmkindik ekenin atap ótti.
– Biz jasandy ıntellekt pen avtomattandyrý dáýirinde ómir súrip jatyrmyz. Bul stantsııa balalardyń robototehnıka, baǵdarlamalaý jáne tsıfrlyq dızaın salasyndaǵy alǵashqy qadamdaryn jasaýyna múmkindik beredi. Bizdiń maqsatymyz – tek tehnologııany meńgerý emes, zamanaýı quraldardy paıdalana otyryp, ulttyq qundylyqtarymyz ben dástúrli ónerimizdi jańa deńgeıge kóterý. Osy jerden shyqqan shákirtter erteńgi kúni elimizdiń ındýstrııasyn alǵa súıreıtin bilikti ınjenerler, ІT-mamandar men ónertapqyshtar bolady dep senemin. Memleket basshysynyń Qazaqstan halqyna arnalǵan Joldaýynda Qazaqstandy tsıfrlyq tehnologııalary damyǵan memleketke aınaldyrýdy el damýynyń basym baǵyttarynyń biri retinde atap ótken bolatyn. Osy strategııalyq mindet aıasynda eldiń bilim berý áleýetin arttyrý maqsatynda «Qazaqstan halqyna» Qorynyń qoldaýymen «Batyr bolamyn» jáne «USTEM Foundation» qorlary balalar men jasóspirimderdiń tsıfrlandyrý jáne jasandy ıntellekt dáýirindegi shyǵarmashylyq, tehnıkalyq jáne zııatkerlik áleýetin damytý, zamanaýı tehnologııalar men dástúrli óner baǵyttaryn ushtastyra otyryp, kásibı daǵdylar qalyptastyrý úshin jumystar atqaryp jatyr. Jas tehnıkterdiń baǵyt-baǵdaryn aıqyndap, olardy bıik belesterge jeteleý – sizderdiń qoldaryńyzda. Stantsııa jumysyna shyǵarmashylyq tabys tileımin! Aıagóz jerinen álemdi tańǵaldyratyn jańa esimder shyǵa bersin. Mekemelerińiz qutty bolsyn, qadamdaryńyz sátti bolsyn, - dedi Berik Ýálı.
«Qazaqstan halqyna» qoǵamdyq qorynyń Basqarma tóraıymy Lázzat Shyńǵysbaeva jańa nysannyń ashylýymen quttyqtady.
– Belsendi jastar, búgingi ortalyqtyń ashylýymen barshańyzdy shyn júrekten quttyqtaımyn. Qala men aýyl balalarynyń sapaly bilim men zamanaýı múmkindikterge qoljetimdiligi teń bolýy qajet. Búgingi jas urpaqtyń áleýeti óte joǵary. Sondyqtan bilim alýdan, izdenýden jáne jańa bastamalardan qoryqpańyzdar. Árdaıym oqyp, damyp, alǵa umtylyńyzdar, - dedi Basqarma tóraıymy
Ashylý saltanatynan keıin oblys ákimi «Qazaqstan halqyna» qoǵamdyq qorynyń Basqarma tóraıymymen birge mekeme ishindegi kabınetterdi aralap, oqýshylarmen, ustazdarmen pikirlesti.
«Jasampaz Urpaq» jobasy Abaı oblysynda 2025 jyldan beri pılottyq rejımde júzege asyrylyp keledi. Joba aıasynda Aıagóz, Jańasemeı, Maqanshy jáne Besqaraǵaı aýdandaryndaǵy qosymsha bilim berý uıymdary tolyq jańǵyrtylyp, zamanaýı tehnologııalyq jabdyqtarmen qamtamasyz etildi. Nátıjesinde aýyldyq jerlerdegi balalar men jasóspirimder úshin ozyq bilim berý resýrstaryna qoljetimdi orta qalyptasty.
Qazirgi tańda úıirmelerge 216 oqýshy qatysady. Jańa baǵyttar iske qosylǵannan keıin taǵy 212 bala úıirmelerge qatysýǵa múmkindik alyp, 428 oqýshy bir mezgilde bilim almaq.
