Aıagózde úıin tasqyn buzǵan 12 otbasy páter kiltin aldy
ÓSKEMEN. QazAqparat - Aıagózde úıin sý basqan 12 otbasy jańa páterge kirdi. Baspana kiltin oblystyń ákimi Danıal Ahmetov tapsyrdy, dep habarlaıdy QazAqparat tilshisi.
Naýryzdyń qarsańynda tasqynnan zardap shekken aıagózdikter jaǵymdy jańalyqqa keneldi. 12 otbasy oblys ákiminiń qolynan jańa páterlerdiń kiltin aldy.
-Az ǵana ýaqyttyń ishinde 12 páterdiń kiltin tabystap otyrmyz. Buıyrsa, endi bir on kúnnen soń taǵy da 15 otbasy jańa baspanaǵa kóshedi. Tek sál shydamdylyq tanytyńyzdar. Sizderdiń osyndaı qýanyshty júzderińizdi kórý biz úshin de bir baqyt» - dedi Danıal Ahmetov.
Páter alǵan otbasylar atynan Aıgúl Saıfýllına, Lılııa Nankovskaıa jáne Merýert Dútbaeva alǵys aıtty.
«Meniń úsh balam bar. Úıimiz qulaǵanda dalada qalǵandaı kúı keshkenbiz. Sol kezde oblys ákimi ózi kelip, jubatqan bolatyn. Ýádesinde turyp, búgin jańa páterdiń kiltin tabys etti. Taǵdyrymyzǵa alańdap, kómek qolyn sozǵan barsha qazaq eline aıagózdikter atynan alǵys aıtamyn», - deıdi Merýert Dútbaeva.
Búginde tasqyn saldarynan 140 úıdiń aýlasyna sý kirip, 14 úı qulaǵany, 18 úıdiń apattyq jaǵdaıǵa túskeni anyqtaldy. Danıal Ahmetov úı-jaıy búlingen aǵaıynǵa da kómek kórsetiletinin atady.
Osy apattyń saldarymen kúresý úshin qurylǵan «Aıagóz bolashaq» qoryna 169 mln teńge túsipti. Onyń 100 mln teńgesi oblystyq «Paryz» qorynan aýdarylǵan. Onyń syrtynda «Qazaqmys» sııaqty alpaýyt kásiporyndar qarjylaı kómek berýde. Elimizdiń túkpir-túkpirinen 34 mln teńgeniń gýmanıtarlyq kómegi jetkizilgen.
