Aıagózde sýyq páterde otyrǵan turǵyndardyń máselesi túbegeıli sheshilmek
AıAGÓZ. QazAqparat - Áleýmettik jeli arqyly úıiniń sýyqtyǵyn aıtyp, shaǵymdanǵan aıagózdik Indıra Muhamadıevanyń jaǵdaıy ákimdik nazaryna ilindi, dep habarlaıdy QazAqparat tilshisi.
Oblystyq energetıka jáne kommýnaldyq sharýashylyq basqarmasynyń basshysy Murat Musataev máseleniń mán-jaıyn anyqtaý úshin Aıagózge bardy.
«Qazir qonaq bólmede eki birdeı tok pesh tur. Sonyń ózinde temperatýra 11°C. Jatyn bólmede tok pesh joq, sondyqtan onda 7 °C qana. Al jýynatyn bólmede tipti 4 °C. Osyndaı «jylý» úshin aı saıyn 9000 teńge tóleımiz. Tok pesh tutynǵan elektr qýaty úshin 8000 jáne tóleımiz, - deıdi Indıra Muhamadıeva jelide jarııalaǵan úndeýinde.
Indıra Muhamadıevanyń aıtýynsha, buǵan deıin Óskemennen arnaıy adamdar kelip, onyń úıindegi temperatýrany arnaıy qurylǵymen ólshepti. Eki birdeı tok pesh qosylyp turǵanyna qaramastan, qonaq bólmedegi jylýdyń 11°C qana ekenine kózderi jetip qaıtqan.
Oblystyq energetıka jáne kommýnaldyq sharýashylyq basqarmasynyń basshysy Murat Musataev máseleniń 3-4 kúnde sheshiletinin aıtty.
«Qazandyqtan shyqqan jylýdyń temperatýrasy 60°C-tan kem bolmaýy tıis. Al munda 50°C qana. Sebebi, jylý almastyrǵysh qural bitelip, eskirgen. Men qazir sol nysannyń basynda júrmin. Aýdan basshylarymen birge máseleni sheship jatyrmyz. 3-4 kúnniń ishinde barlyq úılerge jylý qajetti mólsherde beriletin bolady. Jylý almastyrǵyshty jańalaımyz», - dedi M.Musataev.
Jylý almastyrǵysh bólshekti jańalaý arqyly Aıagózdiń jylý máselesi túbegeıli sheshilmesi anyq. Sol úshin oblys ákimdigi «Aıagóz jylý» JShS-ne shart qoıyp otyr. Bir aıdyń ishinde jylý kompanııasy eskirgen qondyrǵylar men jylý qubyrlaryn jańalaıtyn ınvestor tabýy tıis. Olaı etpegen jaǵdaıda qazandyqty aýdan ákimdigi satyp alady da, kelesi maýsymǵa bıýdjet esebinen jóndeıdi.
Qazir Aıagózde jedel shtab qurylyp, jylý mekemelerinde táýliktik kezekshilik jumys istep tur.
