Aıagózde mal izdep shyǵyp adasyp ketken 8 jasar balany tabýǵa búkil el bolyp jumyldy
SEMEI. KAZINFORM — Abaı oblysynda polıtsııa men qutqarýshylar atqa minip, mal izdep ketken 8 jasar balany izdep tapty.
11 aqpanda Aıagóz aýdanynyń polıtsııa bólimine jergilikti turǵyndar júgingen.
Olar 2015 jyly týǵan uly Mereı Nurjanuly Imanǵalıdy izdeýge kómek suraǵan.
Bala tańerteń atpen úıden shyǵyp ketkennen qaıtyp oralmaǵan.
Týystarynyń aıtýynsha, saǵat 10.00 shamasynda 8 jasar bala mal izdep atqa mingen.
Keshke kelmegen soń alańdaǵan ata-anasy óz betinshe izdep tappaǵan soń polıtsııaǵa júginedi.
Balany izdeý dereý bastaldy, 15 mınýttyń ishinde polıtsııa bóliminiń búkil jeke quramy kóterildi.
Polıtseılerden bólek eriktiler, jurtshylyq jáne aýdannyń qamqor turǵyndary belsendi qatysty.
Balany izdeý jumysyn qolaısyz aýa raıy da qıyndatty.
TJM izdestirý-qutqarý jumysyna barlyǵy 74 adam, eki dron, 17 tehnıka, 20 jylqy jumyldyrylǵanyn atap ótti. Sondaı-aq, TJD qosymsha kúshteri jiberildi.
Búgin túngi 00:00 shamasynda bala aman tabyldy. Ol Aıagóz qalasynyń shet jaǵynan tabylǵan, esh jeri úsimegen, medıtsınalyq kómek qajet bolǵan joq.
