Aıagózde áleýmettik úılerdi jekeshelendirý máselesin sheshý úshin jumys toby quryldy
AıAGÓZ. KAZINFORM - Aıagózdegi 267 turǵyn úı áleýmettik az qamtylǵan, múmkindigi shekteýli jandar men kópbalaly, tolyq emes otbasylarǵa berilgen. Degenmen bıyl atalǵan úılerdi jekeshelendirýge baılanysty qıyndyqtar týyndaǵan.
Atalǵan másele boıynsha oblys ákimi Berik Ýálıdiń tapsyrmasymen oblystyq jumys toby quryldy. Búgin jumys tobynyń músheleri aýdan turǵyndarymen kezdesip, zań aıasynda atqarylatyn sharalardy egjeı-tegjeıli túsindirdi.
Abaı oblysy prokýratýrasynyń qoǵamdyq múddelerdi qorǵaý basqarmasynyń bastyǵy Meıirjan Qalıasqarovtyń aıtýynsha, másele jer ýchaskeleriniń quqyqtyq rásimdelmeýinen týyndaǵan.
– Eń birinshi Jer kodeksiniń talaptaryna sáıkes, jerge degen menshik quqyǵy jáne úıge degen menshik quqyǵy bir-birinen ajyratylmaıdy. Al berilgen úılerdiń jerine qatysty kadastrlyq tólemder memleketke tólenbegen. Bul turǵyndardyń emes, úılerdi salǵan jáne satqan kásipkerlerdiń tarapynan ketken zań buzýshylyqtar, - dedi Meıirjan Qalıasqarov.
Onyń aıtýynsha, endigi kezekte kásipkerler men aýdandyq ákimdik birlese otyryp, ortaq sheshim qabyldaýy tıis. Árbir jer ýchaskesi boıynsha kadastrlyq tólem kólemi 300 myńnan 700 myń teńgege deıin.
– Eger kásipkerler óz erikterimen tólem jasamasa, ýákiletti organdar sotqa júginip, tólemdi májbúrlep óndirip alý sharasyn qoldanady. Biraq turǵyndar alańdamasyn – eshkimdi úıinen qýyp shyǵarmaıdy. Tek jekeshelendirý rásimi 1-2 aıdyń ishinde sheshimin tabady, - dep naqtylady Meıirjan Qalıasqarov.
Aıagóz qalasynyń turǵyny, kópbalaly ana Kúmishan Qydyrmoldına bılik ókilderinen bul máseleniń tezirek sheshilýin surady.
– Men jańa jınalysqa qatystym. Prokýratýra, aýdan ákimdigi, oblys ákiminiń orynbasary boldy. Bizdiń analardyń bar tilegi – úılerdi jekeshelendirip, jer máselesin zańdy túrde sheship berý. Qarasha aıyna deıin sheshiledi dedi, sony kútemiz, - dedi ol.
Oblys ákimi Berik Ýálı bul máseleni qarasha aıynyń sońyna deıin tolyq sheshýdi tapsyrdy.
Jumys toby osy ýaqyt ishinde turǵyndardyń ótinishteri men qujattyq rásimderin zań sheńberinde retteıtin bolady.