Aıagóz ózeninde balyq qyryldy – ShQO
ÓSKEMEN. QazAqparat – Shyǵys Qazaqstan oblysyndaǵy Aıagóz ózeninde balyq qyryldy, dep habarlaıdy QazAqparat tilshisi.
ShQO Orman sharýashylyǵy jáne janýarlar dúnıesi ınspektsııasynyń málimetine súıensek, Aıagóz aýdany Tarbaǵataı aýylynyń mańyndaǵy ózende balyq qyrylǵan. Osyǵan oraı Balyq sharýashylyǵy bólimi sý qoımasyna baryp zertteý júrgizdi.
Sondaı-aq sharaǵa «Balyq sharýashylyǵy ǵylymı-óndiristik ortalyǵy» JShS Altaı aýdandyq fılıalynyń, ShQO Tabıǵı resýrstar jáne tabıǵat paıdalanýdy retteý basqarmasynyń, «Semeı ormany» tabıǵı rezervatynyń ókilderi qatysqan.
«Sonyń nátıjesinde 200 keli ár túrli balyq (Balqash kókbasy, osman, torta, taraq t.b) qyryldy. Onyń ishinde 70 paıyzy – torta, qalǵany basqa balyqtar. Óli balyqtar shamamen 10 sharshy metr aýmaqta anyqtalǵan. Ózen deńgeıiniń kúrt tómendeýi sýdaǵy otteginiń tómendeýine ákelip soqqan kórinedi. Naqty sebebin anyqtaý úshin tıisti synamalar alyndy», - delingen habarlamada.
Aıta keteıik, komıssııa músheleriniń jáne Tarbaǵataı aýylynyń eriktileriniń qatysýymen óli balyqtardy ýtılızatsııalaý jumystary júrgizildi.
