Aıagóz qalasynan kelgen 29 temirjolshy Májilis úıinde boldy
ASTANA. Qyrkúıektiń 21-i. QazAqparat - Búgin QR Parlamenti Májilisiniń depýtaty Nurtaı Sabılıanov Aıagóz qalasynan kelgen temirjolshylardy Májilis úıinde qarsy aldy, dep habarlaıdy QazAqparat.
Qyrkúıektiń 20-sy kúni depýtattyń arnaıy shaqyrýymen Shyǵys Qazaqstan oblysynan kelgen eńbek ardagerleri Elordanyń kórikti jerlerin aralap kórdi. Atap aıtqanda, shyǵysqazaqstandyq qonaqtar Qazaqstannyń Tuńǵysh Prezıdentiniń murajaıynda, Beıbitshilik jáne kelisim saraıynda, «Nur Astana» meshitinde, «Atameken» Qazaqstan kartasy etnomádenı ortalyǵynda jáne Dýman oıyn-saýyq ortalyǵynda bolyp, úlken áser alǵandaryn baıandap berdi.
Astanaǵa kelgenderdiń arasynda temir jol salasynda 30-40 jyldaı eńbek etip, qurmetti demalysqa shyqqandary da bar. Sonyń ishinde zeınetkerler Qaharman Sadyqov, Maqsut Tápenov, Halıda Turarbekova, Dámetken Qujahanova elimizge eseli eńbek sińirgen jandar.
Kezdesýde Májilis depýtaty Nurtaı Sabılıanov Parlamenttiń qurylymy, Májilistiń zań shyǵarý tájirıbesi jaıly aıtyp berdi. Elbasynyń parlamentshilerdiń aldyna qoıǵan mindetteri jaıly toqtalyp ótti.
Kezdesýde Farzangúl Ámirhanova men Nurbaný Asýbaeva «Nur Otan» partııasynan saılanǵan halyq qalaýlysyna rızashylyqtaryn aıta kelip, týǵan jeriniń tilegin jetkizdi.
