Aıagóz halqyna alǵashqy kómek retinde 50 mln teńge bólinedi

ÓSKEMEN. QazAqparat - Aıagózdegi apat ornyna Shyǵys Qazaqstan oblysynyń ákimi Danıal Ahmetov baryp, turǵyndarmen kezdesti. Tasqynnan zardap shekken otbasylarǵa turmystyq kómek kórsetý úshin 50 mln teńge bólinetin boldy, dep habarlaıdy QazAqparat tilshisi.

Tasqynnan qıraǵan úılerdi aralap, turǵyndarmen kezdesken oblys ákimi áýeli el arasynda taraǵan alypqashpa áńgimelerge qatysty túsinik berdi. Aıagóz qalasyna jaıylǵan sýdyń sý qoımasynan jetkeni týraly aqparattyń anyq-qanyǵyn bilý úshin mamandar tikushaqpen aýmaqty zertteıtin boldy. Onyń nátıjesi erteń keshke qaraı belgili bolýy tıis.

Al baspanasy qırap, otyn-sýsyz qalǵan halyqqa kómek retinde 50 mln teńge bólinetin boldy.

Ákimniń sapary barysynda qala boıynsha 8 úıdiń jermen-jeksen bolyp, 10 úıdiń apattyq jaǵdaıǵa túskeni anyqtaldy. 148 úıge sý kirgen. Úısiz qalǵan otbasylarǵa qalanyń basqa bóliginde salynyp jatqan 60 páterli úıden jańa baspana berilýi múmkin ekeni de aıtyldy.

«Qazir bul máselege baılanysty arnaıy komıssııa jumys istep jatyr. Olar óz jumysyn 10-15 kúnniń ishinde aıaqtaıdy. Sondyqtan, turýǵa jaramsyz bolyp qalǵan úılerdiń sany 18-den kóp bolýy múmkin. Qalaı bolǵanda da, eshkim kómeksiz qalmaıdy. Barlyq turǵyndarǵa tıisti kómek kórsetiledi. Eshkim kómeksiz qalmaıdy» - dedi oblys ákimi.    

Foto avtory: Tileýbek Shaıahmetov