«Aıagóz – Baqty» jobasynyń iske asyrylý barysy Beıjińde talqylandy
ASTANA. KAZINFORM – Beıjiń qalasynda Qazaqstan Respýblıkasy Kólik vıtse-mınıstri Jánibek Taıjanovtyń China Harbour Engineering Company Co., Ltd. basshylyǵymen kezdesýi ótti. Kezdesý barysynda «Aıagóz – Baqty» temirjol jobasynyń iske asyrylý barysy talqylandy.
Taraptar tehnıka men resýrstardy jedel jumyldyrý, qurylys qarqynyn arttyrý jáne jumystardy belgilengen merzimde oryndaý máselelerine erekshe nazar aýdardy. Sonymen qatar Qazaqstan men Qytaı Halyq Respýblıkasy arasyndaǵy temirjol jelisiniń túıisý núktelerin aıqyndaý máseleleri qarastyryldy.
Qazaqstan tarapy otandyq qurylys kompanııalary men mamandaryn keńinen tartýdyń, sondaı-aq qazaqstandyq óndiris materıaldaryn paıdalanýdyń mańyzdylyǵyn atap ótti.
Kompanııa ókilderi jobany bekitilgen kestege sáıkes júzege asyrýǵa daıyn ekenin rastady. Sondaı-aq jobaǵa jergilikti merdigerlerdiń mindetti túrde qatysatyny aıtyldy.
Aıta keteıik, 2025 jylǵy tamyzda Qazaqstan temir joly UK men China Harbour Engineering Company Co., Ltd. arasynda EPC-kelisimshartqa qol qoıylǵan bolatyn.
Jalpy, «Aıagóz – Baqty» jobasyn iske asyrý Qazaqstan men Qytaı arasyndaǵy kólik dálizderiniń ótkizý qabiletin edáýir arttyrýǵa múmkindik beredi.
Eske salaıyq, Atyraýda 9 temirjol vokzaly jańartylyp jatqany habarlandy.
