Aı saıyn 2,5 mln adam eGov mobıldi qosymshasyn belsendi paıdalanady – mınıstr

ALMATY. QazAqparat - Búginde memlekettik qyzmetterdiń 80 paıyzy eGov mobıldi qosymshasynda qoljetimdi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Digital Almaty 2023: jańa bolmystaǵy tsıfrlyq áriptestik» atty halyqaralyq forým barysynda aıtty, dep habarlaıdy QazAqparat tilshisi.

«Aı saıyn 2,5 mıllıon adam eGov mobıldi qosymshasyn belsendi túrde paıdalanyp jatyr. Qazirdiń ózinde 20 tsıfrlyq qujat engizildi. Kún saıyn qosymshaǵa 200 myń qoldanýshy kiredi. Kórsetkish áli de óse beredi dep oılaımyn. Biraq biz eGov mobile-nyń tanymaldylyǵyna ǵana mán bermeımiz sonymen qatar barlyq sala úshin múmkindik jasap jatyrmyz», - dedi mınıstr.

Sondaı- aq ol QR qoltańbasy týraly aıtty.

«QR qoltańbasy júzege asyrylýda. Sot keńsesine kirýge nemese «Otbasy bankinde» ıpotekalyq nesıege qujattarǵa qol qoıý úshin elektrondyq tsıfrlyq qoltańbany fleshkada alyp júrýdiń qajeti joq. eGov uıaly telefonyńyz arqyly skanerleý úshin QR-kod jetkilikti. Búginde árbir adamnyń telefonyna eGov mobile qosymshasy júktelgen, QR skaneri arqyly kez kelgen qujatqa qol qoıýǵa bolady», - dedi ol.

Mınıstr eGov mobıldi júıesinde engizilip jatqan ınnovatsııalar búkil salaǵa qoljetimdi ekenin atap ótti.

«Sondaı-aq eGov mobile-ge biz eOtinish, eDensaulyk sııaqty qyzmetterdi engizdik. Mysaly, eOtinish arqyly 2,5 mıllıon Qazaqstan azamaty memleketke túrli máseleler boıynsha óz ótinishterin joldady, al eDensaulyk saıtynda biz kóptegen medıtsınalyq qyzmetterdi iske asyrdyq»,- dedi Baǵdat Mýsın.

Mınıstrdiń aıtýynsha, qazirgi ýaqytta barlyq memlekettik qyzmetterdiń 80 paıyzy eGov mobıldi qosymshasynda qoljetimdi. Qazirdiń ózinde 50 mln astam memlekettik qyzmet kórsetildi.