Aı betindegi alǵashqy qonaqúı qalaı jumys isteýi múmkin
ASTANA. KAZINFORM – Ǵaryshtaǵy týrızm fantastıka sheńberinen shyǵyp keledi. GRU Space startapy 2032 jylǵa qaraı Aı betinde alǵashqy qonaqúı keshenin iske qosýdy kózdep otyr. Joba tek aýqatty týrısterge arnalǵan saparmen shektelmeı, adamzattyń Jerden tys turaqty ómir súrýine jol ashýdy kózdeıdi.
Jospar birneshe kezeńmen júzege asyrylady. Eń birinshi Aıǵa shaǵyn qurylǵylar men germetıkalyq zerthanalyq modýl jetkiziledi. Bul kezeńde jasandy ortanyń Aı keńistiginde qalaı isteıinin tekseredi. Sonymen qatar jergilikti regolıtti (meteorıtter áserinen úgitilgen, Aı betinde jatqan usaq tas pen shań qabaty) paıdalana otyryp qurylys júrgizý tehnologııalaryn synaqtan ótkizedi. Osy sııaqty jumystar arqyly adamdardyń Aıǵa qonýyna deıingi negizgi tehnıkalyq qaýipterdi azaıtpaq.
Kelesi kezeńde mıssııa Aıdaǵy tabıǵı úńgirler men kraterlerdi (meteorıt soqqysynan paıda bolǵan oıys shuńqyrlar) zertteýge kóshedi. Mundaı nysandar radıatsııadan jáne temperatýranyń kúrt aýytqýynan tabıǵı qorǵanys bola alady. Osyndaı aýmaqtardyń birinde úrlemeli turǵyn modýl ornalastyrylyp, qurylys tásilderi odan ári synaqtan ótedi. Bul bolashaqta iri ári turaqty nysandar salýǵa negiz bolady.
Aıdaǵy alǵashqy qonaqúı
Negizgi mıssııa 2032 jylǵa josparlanǵan. Dál sol jyly GRU Space Aı betine alǵashqy týrıstik qonaqúıdi ornalastyrýdy kózdep otyr. Jerde daıyndalǵan úrlemeli qurylym aýyr qoný apparaty arqyly jetkiziledi. Qonaqúı bir mezette tórt adamdy birneshe táýlik boıy qabyldaı alady. Kompanııa málimetinshe, keshen shamamen on jyl qyzmet etýi múmkin.
Qonaqtarǵa Aıdyń betki kórinisin jáne Jerdiń alystan kórinetin kelbetin tamashalaý múmkindigi qarastyrylǵan. Baǵdarlamada gıdpen birge Aı betinde serýendeý, arnaıy kóliktermen júrý jáne tómen tartylys kúshine beıimdelgen oıyndar bolady.
Týrısterdi Aıǵa jetkizý jáne keri qaıtarý jumystaryn lıtsenzııalanǵan kommertsııalyq tasymaldaýshylar atqarady. Al GRU Space Aı betindegi barlyq protsesti úılestirip, qoný ornyndaǵy ınfraqurylymnyń jumysyn qamtamasyz etedi.
Kompanııa ókilderiniń aıtýynsha, mundaı saparlardan túsetin tabys Aıda uzaq ýaqyt turýǵa qajetti tehnologııalardy damytýǵa jumsalady. Olardyń qatarynda avtonomdy qurylys júıeleri, jabyq turǵyn keshender jáne jergilikti resýrstardy paıdalaný tásilderi bar.
Aıǵa qalaı jetemiz jáne onyń quny qandaı?
GRU Space óz zymyrandaryn ázirlemeıdi. Aıǵa ushýdy SpaceX nemese Blue Origin sııaqty kommertsııalyq kompanııalar júzege asyrýy múmkin. Olar ushyrý, Aı orbıtasyna shyǵý, qoný jáne Jerge qaıtýǵa jaýap beredi.
Alǵashqy nusqada Aı betine júk jetkizý quny 1 keli úshin 100 myń dollar dep eseptelgen. Qonaqúıdiń jalpy salmaǵy shamamen 10 tonna bolǵan jaǵdaıda, bir adamǵa bir táýlik turýdyń ishki shyǵyny 416 myń dollardan asady. Al kelesi kezeńde qurylysqa Aı topyrasy paıdalanylsa, bul soma birneshe ese tómendeýi múmkin.
Kompanııanyń aldaǵy jospary
Kompanııanyń jospary tek qonaqúımen shektelmeıdi. Aldaǵy josparlary boıynsha úrlemeli turǵyn modýlderi Aı topyraǵynan turǵyzylǵan qorǵanysh qurylymynyń ishine ornalastyrylady. Bul qonaq sanyn kóbeıtip, keshenniń qyzmet etý merzimin uzartýǵa jol ashady.
GRU Space bul tásil Aıda adamnyń turaqty túrde bolýyna negiz qalaıdy dep esepteıdi. Keıin osy tájirıbeni Marsqa beıimdeý de josparlanyp otyr.
Kompanııa ókilderi bul bastama AQSh-tyń ǵarysh saıasatyna saı keletinin atap ótti. NASA men Aq úı Aıda turaqty baza qurýdy Marsqa ushýǵa daıyndyqtyń mańyzdy kezeńi retinde qarastyryp otyr. Al mundaı josparlardy júzege asyrý úshin Aı betinde kommertsııalyq ınfraqurylym qajet.
Aıta keteıik, buǵan deıin Qytaılyq CAS Space ǵaryshtyq týrızmge arnalǵan sýborbıtaldy apparatty sátti ushqanyn jazǵan edik.