Axmetjan Esimov Úkimetten shetelde qordyń aktıvterin barynsha qorǵaýdy surady
"Ókinishke qaraı, avtıvterdi tyıym salýyna baılanysty sheteldik ıýrısdıktsııalardaǵy sot protsesterine qordy udaıy tartý praktıkasy beleń alýda. Atap aıtqanda, 2017 jyly Statı talaptary boıynsha qorǵa tıesili quny 5 mıllıardtan astam AQSh dollaryn quraıtyn Qashaǵan aktsııalaryna shekteý qoıyldy. Al 2018 jyly Aqtaý Petroldyń respýblıkaǵa qoıǵan talaptary boıynsha qorǵa tıesili quny 38 mıllıonnan astam AQSh dollaryn quraıtyn Túrkııadaǵy Shekerbank aktsııalaryna tyıym salyndy. Ony bárińiz jaqsy bilesizder. Qordyń aktıvterine tyıym salý qaýpi jalpy bizdiń aktıvterimizdiń ınvestıtsııalyq tartymdylyǵyna aıtarlyqtaı jaǵymsyz áser etýde", - dedi A.Esimov Úkimettiń búgingi otyrysynda.
Osyǵan baılanysty qor basshysy arnaıy mexanızmdi tezdetip engizýdi usyndy. Sonyń arqasynda qordyń aktıvterin qorǵaýǵa bolady.
"Buny men tek Roman Vasılevıchke (QR Indýstrııa jáne ınfraqurylymdyq damý mınıstri - avt.) ǵana emes, basqa da jigitter osy máseleniń biz úshin qanshalyqty mańyzdy ekenin jaqsylap túsinsin degenim ǵoı. Osyǵan baılanysty biz ádilet jáne qarjy mınıstrlikterinen Qazaqstan Respýblıkasyna qarsy shyǵarylǵan xalyqaralyq protsester boıynsha sheshimderdi oryndaý mexanızmin ázirleýdi usynǵan edik. Ondaı mexanızm bolsa, ol arqyly ulttyq qordyń, kvazımemlekettik sektordyń aktıvterine tyıym salýdan qorǵanýǵa bolady", - dep atap kórsetti A.Esimov.
