Axmetjan Esimov «Samuryq-Qazynanyń» tabysyn jarııalady
ASTANA. QazAqparat - Qordyń negizgi qyzmetten túsetin tabysy 31 protsentke ósti. Al debıtorlyq qaryzdyń kólemi 80 protsentke azaıdy, dep xabarlaıdy QazAqparat tilshisi.
«Samuryq-Qazyna» AQ basqarma tóraǵasy Axmetjan Esimovtyń aıtýynsha, ótken jyly atqarylǵan jumystyń nátıjesinde qorǵa kiretin kompanııalardyń qarjylyq turaqtylyǵy arta tústi. Osynyń arqasynda qordyń jalpy qaryzy 1 trıllıon teńgege deıin tómendedi.
«Bizdiń syrtqy qaryzymyz 3,2 mıllıard dollarǵa azaıdy. Al debıtorlyq qaryz 80 protsentke - 331 mıllıardtan 66 mıllıard teńgege tómendedi. Sóıtip, negizgi qyzmetten túsetin tabystyń kólemi 31 protsentke ósip, 8,3 trıllıon teńgeni qurady. Taza tabysymyz 37 prootsentke kóterilip, 820 mıllıard teńgege jetti. Al operatsııalyq tabys 1 trıllıonnnan asty», - dedi A.Esimov qordyń búgingi keńesinde.
Onyń sózine qaraǵanda, «QazMunaıGaz» kompanııasy 1,6 mıllıard dollardyń eýrooblıgatsııalaryn sátti ótep shyqty. Al «Samuryq-Energo» kompanııasy 50 mıllıard teńgeniń qaryzynan qutyldy.
«Atalǵan sharalardyń arqasynda QazMunaıGaz ben Samuryq-Energo qarjylaı táýkelderi bar qyzyl zonadan shyqty. Ótken jyldyń basynda atalǵan zonada úsh kompanııa boldy. Endi, bireýi ǵana qaldy», - dep atap kórsetti A.Esimov.
