Axmetjan Esimov birqatar aqtsııalardy «Taý-Ken Samuryq» kompanııasyna berýdi usyndy
NUR-SULTAN. QazAqparat - «Samuryq-Qazyna» qorynyń basshysy Axmetjan Esimov «Taý-Ken Samuryq» kompanııasyn kúsheıtýdi usynyp otyr, dep xabarlaıdy QazAqparat tilshisi.
«Biz buny kezinde Elbasyna usynǵanbyz. Ózińiz de jaqsy bilesiz, Asqar Uzaqbaıuly (QR Premer-Mınıstri - avt.). Bul - «Taý-Ken Samuryq»-tyń negizinde satylmas biriktirilgen keshen qurý máselesi. Qor taý-ken jáne metalýrgııalyq salany keshendi damytý, onyń ishinde geologııalyq barlaý jáne ǵylymı-texnıkalyq áleýetti arttyrý múmkindikterin qarastyrýda. Ol úshin Qazgeologııa, Metallýrgııa jáne ken baıytý ınstıtýty, sondaı-aq, ERG aktsııalarynyń memlekettik paketi sııaqty aktıvterdiń áleýetin «Taý-Ken Samuryq» kompanııasyna berý jolymen shoǵyrlandyrýdy talap etedi», - dedi A.Esimov Úkimettiń búgingi otyrysynda.
Aıta keteıik, qor basshysy shetelde qordyń aktıvterine toqtam salý máselesin de kóterdi.
«Ókinishke qaraı, aktıvterdi tyıym salýyna baılanysty sheteldik ıýrısdıktsııalardaǵy sot protsesterine qordy udaıy tartý praktıkasy beleń alýda. Atap aıtqanda, 2017 jyly Statı talaptary boıynsha qorǵa tıesili quny 5 mıllıardtan astam AQSh dollaryn quraıtyn Qashaǵan aktsııalaryna shekteý qoıyldy. Al 2018 jyly Aqtaý Petroldyń respýblıkaǵa qoıǵan talaptary boıynsha qorǵa tıesili quny 38 mıllıonnan astam AQSh dollaryn quraıtyn Túrkııadaǵy Shekerbank aktsııalaryn tyıym salyndy. Ony bárińiz jaqsy bilesizder. Qordyń aktıvterine tyıym salý qaýpi jalpy bizdiń aktıvterimizdiń ınvestıtsııalyq tartymdylyǵyna aıtarlyqtaı jaǵymsyz áser etýde», - deıdi A.Esimov.
Budan bólek, Axmetjan Esimov «MAEK-Qazatomónerkásip» kompanııasyn memlekettik menshikke berý sharalary týraly aıtyp berdi.
