Axios: Izraıl AQSh-ty Iranmen soǵysýǵa shaqyrady

ASTANA. KAZINFORM – Izraıl keıingi 48 saǵat boıy AQSh prezıdenti Donald Tramp ákimshiligin Iranǵa qarsy áskerı qımyldarǵa qosylýǵa shaqyrdy, dep habarlaıdy Kazinform Axios basylymyna silteme jasap.

Atalǵan aqparat kóziniń habarlaýynsha, «Irannyń ıadrolyq baǵdarlamasyn joıý úshin» qajet. 

Basylym eki joǵary laýazymdy ızraıldik derekkózge silteme jasaı otyryp, Izraılde Irannyń Fordoýdaǵy jerasty ýran baıytý zaýytyn joıýǵa qajetti býnkerler men iri bombalaýshy ushaqtar joq, al AQSh-ta bar dep habarlaıdy. 

Eske salaıyq, 13 maýsymǵa qaraǵan túni Izraıl Iran aýmaǵyna jappaı soqqy jasaǵan. Oǵan jaýap retinde Tegeran júzden astam drondy Izraıl baǵytyna ushyrǵan. Iran Natanzdaǵy ıadrolyq nysannyń zaqymdanǵanyn rastady, alaıda radıatsııanyń taralýyn joqqa shyǵardy.

BUU-daǵy Iran ókili Izraıldiń áýe soqqylary saldarynan 78 adamnyń qaza tapqanyn, taǵy 320-dan astam adamnyń jaraqat alǵanyn málimdedi. Qaza bolǵandar qatarynda Irannyń joǵary áskerı basshylyǵy men jetekshi ǵalymdar bar.

Sondaı-aq Izraıldiń shabýyldarynan keıin Iran Ormýz buǵazyn jabý múmkindigin qarastyryp jatqanyn Iran parlamentiniń ulttyq qaýipsizdik jáne syrtqy saıasat jónindegi komıtet múshesi Esmaıl Kosarı habarlady.

Iran men AQSh arasyndaǵy kelissózderge araǵaıyndyq jasap júrgen Oman Syrtqy ister mınıstri Badr ál-Býsaıdı Maskatta jeksenbi kúni ótýi tıis kezdesýdiń endi ótpeıtinin rastady.

Iran Prezıdenti Emmanýel Makronmen sóılesý kezinde Izraıl shabýyldaryn toqtatpaıynsha AQSh-pen eshqandaı kelissóz júrgizilmeıtinin málimdedi.