Avtojýýda kóligińizge zaqym kelse, mekeme keltirilgen shyǵyndy óteýge mindetti me
ÓSKEMEN. KAZINFORM – Avtojýýdyń nemese tehnıkalyq qyzmet kórsetý ortalyǵynyń qyzmetkeri kóligińizge zaqym keltirse, óz quqyǵyńyzdy qalaı qorǵaı alasyz? Kazinform tilshisi bul suraqtyń jaýabyn bilip kórdi.
Tehnıka bolǵan soń kez-kelgen avtokólik ara-tura jóndeýdi qajet etedi. Sol kezde tehnıkalyq qyzmet kórsetý ortalyqtaryna baryp, kóligińizdi senip tapsyrasyz. Temir tulparyńyz kirlep ketse onda avtojýýǵa júginesiz.
Alaıda TQKO nemese avtojýý qyzmetkerleri arasynda kólikke abaısyzda zaqym keltirip alyp jatatyndar bolady. Osyndaı kezde ne isteý kerek? Bul suraqqa Shyǵys Qazaqstan oblysy boıynsha Saýda jáne tutynýshylardyń quqyqtaryn qorǵaý departamenti basshysynyń orynbasary Andreı Troeglazov jaýap berdi.
Belgili bolǵandaı, eger avtoservıste kóligińizge zaqym kelse, eń aldymen osy faktini tirkep alý qajet. Servıs qyzmetkerlerinen bolǵan jaǵdaı týraly akt nemese jazbasha túsinikteme berýdi talap etińiz. Sondaı-aq kóliktiń zaqymdanǵan jerlerin ózińiz foto jáne vıdeoǵa túsirip alǵanyńyz durys. Bul materıaldar zaqymnyń qyzmet kórsetý barysynda keltirilgenin dáleldeıtin aıǵaq retinde qoldanylady.
Osydan keıin avtoservıs basshylyǵyna jazbasha talap-aryzben júginýge bolady. Onda qyzmet kórsetilgen kún men onyń túrin kórsetý, anyqtalǵan zaqymdardy egjeı-tegjeıli sıpattaý jáne naqty talaptardy jazý qajet. Máselen, zaqymdy aqysyz joıýdy, kólikti qalpyna keltirýge jumsalatyn shyǵyndy óteýdi nemese kórsetilgen qyzmet qunyn tıisinshe tómendetýdi talap etýge bolady.
- Tutynýshylardyń quqyqtaryn qorǵaý týraly zańnamaǵa sáıkes, oryndaýshy klıenttiń múlkiniń saqtalýyna jaýap beredi. Eger múlikke keltirilgen zııan ózine baılanysty emes sebepterden bolǵanyn dáleldeı almasa, jaýapkershilik oryndaýshyǵa júkteledi. Osyǵan baılanysty avtoservıs tutynýshynyń talabyn qarap, zańda belgilengen merzimde oǵan jaýap berýge mindetti, - deıdi Andreı Troeglazov.
Eger avtoservıs keltirilgen zalaldy erikti túrde óteýden bas tartsa, tutynýshy quqyqtaryn qorǵaýǵa ýákiletti organdarǵa nemese sotqa júginýge quqyly. Osyndaı daýlardy qaraý barysynda, ádette, zaqymnyń qashan jáne qandaı jaǵdaıda paıda bolǵanyn anyqtaıtyn saraptama taǵaıyndalady.
Al kólikke keltirilgen zaqym avtojýý qyzmetin kórsetý barysynda mekemeniń kinásinen bolǵany anyqtalsa da QR «Tutynýshylardyń quqyqtaryn qorǵaý týraly» Zańynyń 35-babynda (qyzmet kórsetilgen kezdegi tutynýshynyń quqyqtary) jáne Azamattyq kodekstiń zalaldy óteý týraly normalary boıynsha shaǵymdana alasyz.
- Ol kezde de tutynýshy áýeli avtojýý qyzmetin kórsetý ortalyǵyna hat jazyp, zalaldy óteýdi talap ete alady. Sonymen qatar kóliktiń zaqymdalǵanyn dáleldeıtin foto nemese vıdeony qosa bere otyryp, ýákiletti organǵa nemese sotqa shaǵymdanýǵa quqyly, - deıdi ShQO Saýda jáne tutynýshylardyń quqyqtaryn qorǵaý departamenti basshysynyń orynbasary.
Túıin
Qoryta aıtqanda, kólikti avtojýýǵa nemese tehnıkalyq qyzmet kórsetý ortalyǵyna tapsyrǵan kezde onyń saqtalýyna jaýapkershilik mekeme qyzmetkerlerine de júkteledi.
Sondyqtan qyzmet kórsetý barysynda kólikke zaqym kelse, tutynýshy óz quqyǵyn qorǵaýǵa jáne keltirilgen zalaldy óteýdi talap etýge quqyly. Eń bastysy, zaqymnyń dálelderin der kezinde jınap, talapty jazbasha túrde usyný.
Eske salsaq, osyǵan deıin Almatyda avtojýý qyzmetkeri mas kúıinde klıenttiń kóligin soqqany habarlanǵan.
