Avtojoldardaǵy qaýipsizdik sharalary: 484 myń belgi ornatylǵan

ASTANA. QazAqparat – Avtojoldardaǵy qaýipsizdik sharalary kópshilik pikirine qaraı qabyldanady. Bul týraly Premer-Mınıstrdiń birinshi orynbasary Roman Sklıar málim etti, dep habarlaıdy QazAqparat.

«Halyqtyń pikirin eskere otyryp, jaryqtandyrý jáne baǵdarsham obektileri, sıgnaldyq baǵanalar, shý jolaqtary, jaryqdıodty jáne basqa da eskertý jol belgileri ornatylyp jatyr. 16 myń shaqyrymǵa jýyq jol jaryqpen qamtyldy, 4 myńnan astam baǵdarsham nysany, 484 myń jol belgisi, 500 jol býferi ornatyldy, 5 myń sharshy metrden astam shý jolaǵy ornalastyryldy», - dep jazylǵan R. Sklıardyń depýtat saýalyna jaýabynda.

Sondaı-aq, elimiz boıynsha 988 myńnan astam beınebaqylaý kamerasy bar, onyń 189 myńy jedel basqarý ortalyqtary men polıtsııanyń kezekshi bólimderine shyǵaryldy. Atalǵan kameralar negizinen adamdar kóp jınalatyn oryndarda, joldarda, turǵyn úı alaptarynyń aýlalarynda, neǵurlym krımınogendi jáne t.b. ýchaskelerde ornatylǵan.

Buǵan deıin Roman Sklıar málim etken eldegi jol-kólik apaty týraly statıstıkalyq derekter jarııalanǵan edi.

Sonymen birge, 2025 jylǵa deıin eldegi normatıvtik jaǵdaıdaǵy joldar úlesin 100%-ǵa jetkizý kózdelgen.