Avtojoldarda kólik salmaǵyn ólsheıtin avtomattandyrylǵan júıe engiziledi
ASTANA. 20 naýryz. QazAqparat - Elimizdiń avtojoldarynda kólik salmaǵyn ólsheıtin avtomattandyrylǵan júıe engiziledi. Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine kólik máseleri boıynsha ózgerister men tolyqtyrýlar engizý týraly» zań jobasy boıynsha baıandaǵan Kólik jáne kommýnıkatsııa mınıstri Asqar Jumaǵalıev osylaı málim etti.
Mınıstr baıandama barysynda kóliktik baqylaý máselelerinde, onyń ishinde avtojoldardyń saqtalýyn qamtamasyz etý máselelerine toqtalyp ótti. «Búgingi kúni kóliktik baqylaý beketteri respýblıkalyq joldardaǵy avtokólik aǵynynyń 30 paıyzyn ǵana tekseredi. Osyǵan baılanysty salmaq ólsheýdiń avtomattandyrylǵan júıesin engizý usynylady. Bul shara arqyly sybaılas jemqorlyqty azaıtý kózdelip otyr. Onyń ústine jańa júıe júk jetkizý ýaqytyn qysqartýǵa, tasymaldyń ózindik qunyn tómendetýge múmkindik beredi», - deıdi A. Jumaǵalıev.
Toqtala ketetin jaıt, búgingi kúni el avtojoldarynda 3 avtomattandyrylǵan ólsheý quraly synaqtyq tártipte jumys isteýde.
