Avtojol salýda kóbine belgili bir merdigerler tapsyrys alyp otyrǵan - Bas prokýratýra
Kólik joldaryn salý jáne jóndeý kezinde bıýdjet qarajatyn jymqyrý jáne sybaılas jemqorlyq faktileri anyqtalǵan. Bıýdjet qarajatyn zańsyz shyǵarý shemalarynda kóbine belgili bir merdiger uıymdary bolǵan.
Atap aıtqanda, osyndaı fırmalardyń biriniń ókilderi Aqmola óńiriniń Qoıandy kentinde 907 mln teńgege kúrdeli jóndeý jáne jergilikti jol qurylysyn jasamaǵandyǵy belgili boldy. Kelisimshart buzyldy, óńirdegi prokýrorlar sotqa deıingi tergep-tekserýge bastamashylyq jasap, onyń sheńberinde qylmystyq quqyq buzýshylyq jasaýdyń mán-jaılary anyqtalyp jatyr.
Soltústik Qazaqstan oblysynda jol jóndeýge bólingen 423 mln teńgeni jymqyrdy degen aıyppen Ǵ. Músirepov atyndaǵy aýdan ákimdiginiń jáne jergilikti merdiger mekemeniń basshylary qamaýǵa alynyp, jaýapqa tartyldy. Jumystardy qabyldaý týraly jalǵan aktiler boıynsha joldyń joqtyǵyna qaramastan, mıllıondaǵan memlekettik qarjyny aýdarǵan.
Memlekettik satyp alý kezinde oryndaýshylardy tańdaý kezeńinde jemqorlyqqa jıi jol beriledi. Máselen, aýdan prokýrorlarynyń aralasýynan keıin Aqmola oblysy Arshaly aýdany ákimdiginiń bólim basshysy Ekaterınbýrg-Almaty avtobanynan Bersýat aýylyna deıingi ýchaskeni kúrdeli jóndeý boıynsha 1,1 mlrd teńgege zańsyz shart jasasqany úshin teris sebeptermen jumystan bosatylǵan bolatyn.
Prokýrorlar bıýdjettiń negizsiz shyǵyndarynyń jolyn kesýge erekshe nazar aýdarady. Shyǵys Qazaqstan oblysynyń Altaı aýdanynda jóndelgen ýchaskege 148 mln astam bıýdjet qarajatyn artyq jumsaýǵa jol berilmedi jáne basshylyq býyndaǵy kináli laýazymdy tulǵa tıisti tártiptik jazaǵa tartyldy.
Tekserý qorytyndysy boıynsha barlyǵy 300-den astam zań buzýshylyq anyqtaldy, 30 mlrd teńge somasyna bıýdjet shyǵyndarynyń aldy alyndy, memleket kirisine 2,5 mlrd teńge óteldi, 29 qylmystyq is qozǵaldy, 305 adam tártiptik jáne ákimshilik jaýapkershilikke tartyldy.
Joldardyń qanaǵattanarlyqsyz jaǵdaıyna orynsyz josparlaý, ınnovatsııalardy enjar engizý, beriktigi joǵary materıaldarǵa únemdeý jáne basqa da jaıttar yqpal etip otyr.
Osyǵan baılanysty, Bas prokýratýra Úkimetke qaralyp jatqan sheteldik ozyq tájirıbege negizdelgen kólik joldary salasyn túbegeıli ózgertý boıynsha usynystarmen qadaǵalaý aktisin engizdi.
