Avtojol salasyn reformalaýǵa qatysty 224 memlekettik qyzmetshi qysqartylady - Kólik mınıstrligi
ASTANA. 5 maýsym. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine avtojol salasyn reformalaý máseleleri boıynsha ózgerister men tolyqtyrýlar engizý týraly» zań jobasy brinshi oqylymda maquldandy.
Zań jobasy sapaly joldarmen qamtamasyz etýge, ony kútip ustaýǵa, bilikti mamandardy tarta otyryp, salany basqarýdy qaıta ońtaılandyrýǵa baǵyttalady. Reformalaý sheńberinde respýblıkalyq mańyzy bar avtokólik joldaryn kútip ustaýdy qazirgi kúni jol qyzmetin atqaryp otyrǵan «QazAvtojol» aktsıonerlik qoǵamy júzege asyryp, ol kompanııa aldaǵy ýaqytta da ulttyq operator retinde basqarýdy jalǵastyra beretin bolady. Soǵan oraı, zań jobasynda «QazAvtojol» men kólik mınıstrliginiń quzyrettik arajikteri ajyratylady.
«Osy saladaǵy memlekettik saıasatty iske asyrý, jalpy paıdalanýdaǵy avtomobıl joldaryn josparlaý, normatıvtik quqyqtyq aktiler men standarttardy engizý, jol qurylysynyń sapasyna baqylaýdy kúsheıtý sharalaryn Kólik jáne kommýnıkatsııa mınıstrligi júzege asyratyn bolady. Al ulttyq operator avtomobıl joldaryn salý, qaıta jańartý, jóndeý men ustaý jumystaryn uıymdastyryp, baqylaıdy. Aqyly avtomobıl joldaryndaǵy tólemder jınaýdy júzege asyratyn bolady», - deıdi Kólik jáne kommýnıkatsııa vıtse-mınıstri Roman Sklıar.
Onyń aıtýynsha, reformalaý sheńberinde 224 memlekettik qyzmetshi qysqaratyn bolady. «Ulttyq operatordyń jeke ınvestıtsııa tartý esebinen memlekettik jekemenshik áriptestikti damytý úshin jaǵdaılar jasalady. Ol jol jóndeý jumystarynyń kólemin ulǵaıtýǵa, servıstik qyzmet sapasyn arttyrýǵa múmkindik beredi», - dedi R.Sklıar.
