Avtojol salasyndaǵy zańbuzýshylyqtardan keıin baqylaý tetigi qalaı ózgeredi
ASTANA. KAZINFORM — Avtojol salasyndaǵy anyqtalǵan zańbuzýshylyqtar men tekserýlerden keıin jol sapasyn baqylaý tetigin ózgertý usynyldy. Atap aıtqanda, qurylys kezindegi tehnıkalyq qadaǵalaý qyzmetin Jol aktıvteri sapasynyń ulttyq ortalyǵyna berý kózdelip otyr. Bul týraly «QazAvtoJol» AQ basqarma tóraǵasy Darhan Imanashev Úkimettegi brıfıngte málimdedi.
Brıfıngte jýrnalıster Memleket basshysynyń Joldaýynda avtojol salasyndaǵy máseleler, sonyń ishinde qurylys merzimderiniń buzylýy jáne ortalyq pen óńirler arasyndaǵy jaýapkershiliktiń naqty bólinbeýi synǵa alynǵanyn eske saldy.
Sondaı-aq saladaǵy jaǵdaıǵa baılanysty qozǵalǵan qylmystyq ister, 36 mlrd teńgeniń tenderleriniń kúshin joıý máselesi kóterildi. Osy oraıda jýrnalıst «Halyqtyq qurylys» baǵdarlamasy aıasynda jol sapasyn baqylaý tetigi naqty qalaı ózgeretinin surady.
Darhan Imanashev avtojol salasyna qatysty aıtylǵan syn-eskertpeler men keltirilgen faktilerdi moıyndady.
— Jumys toby quryldy. Onda jol salasyna qatysty osy ýaqytqa deıin sheshimin tappaǵan jáne ózekti máselelerdiń barlyǵy qarastyrylyp jatyr. Jumys toby aıasynda tıisti usynystar ázirlenip jatyr, — dedi ol.
Onyń aıtýynsha, jumys barysynda birneshe túıtkil anyqtalǵan. Atap aıtqanda, qurylysqa qajetti karerlerdi anyqtaý merzimi uzaqqa sozylady. Sonymen qatar qurylys barysyn tehnıkalyq qadaǵalaý qyzmetiniń jumysy da syn kótermeıdi.
Osyǵan baılanysty tehnıkalyq qadaǵalaý qyzmetin Jol aktıvteri sapasynyń ulttyq ortalyǵyna berý usynylǵan.
— Qazir jumys toby aıasynda basqa da usynystar qarastyrylyp jatyr. Osy aıdyń sońyna deıin olar Premer-Mınıstrge usynylyp, tıisti jol kartasy bekitiledi. Onda qysqa merzimde júzege asyrylatyn jedel sheshimder de, ǵylymı negizdeýdi qajet etetin uzaq merzimdi sharalar da qamtylady. Basty nazarda — jol sapasy, baqylaý jáne qurylys merzimderin qysqartý máseleleri, — dedi Darhan Imanashev.
Budan bólek, jýrnalıster avtojol salasyndaǵy zańbuzýshylyqtarǵa qatysty qozǵalǵan qylmystyq isterdiń nátıjesi týraly surady.
«QazAvtoJol» basshysy qazirgi ýaqytta tekserý jumystary júrip jatqanyn aıtty. Alaıda onyń nátıjeleri ázirge tanystyrylmaǵandyqtan, bul máselege qatysty túsinikteme bere almaıtynyn jetkizdi.
Buǵan deıin Nurlybek Nálibaev qarajattyń qaı salalarǵa bólinetinin túsindirdi.
