Avtojol salasynda qyzmetkerlerdiń kásibı damýy úshin jańa erejeler engizildi

ASTANA. KAZINFORM — Jol ınfraqurylymynyń sapasy men qaýipsizdigin arttyrý maqsatynda avtojol salasy qyzmetkerleriniń biliktiligin mindetti túrde arttyrý qaǵıdalary resmı túrde bekitildi.

Kólik mınıstrligi taratqan aqparatqa sáıkes jańa talaptar boıynsha mamandar keminde úsh jylda bir ret uzaqtyǵy 40 akademııalyq saǵattan kem emes kýrstardan ótýi tıis. 

— Al jol uıymdarynyń basshylary qyzmetke taǵaıyndalǵannan keıin alty aı ishinde oqytýdan ótedi. Baǵdarlamalar tájirıbege negizdelip, dáristerdi, semınarlardy, trenıngterdi jáne taǵylymdamalardy qamtıdy. Oqytýǵa otandyq jáne sheteldik sarapshylar tartylady, — delingen mınıstrlik habarlamasynda.

Kýrsty aıaqtaǵandar qorytyndy baǵalaýdan ótip, úsh jylǵa jaramdy sertıfıkat alady. Bul — mamandardyń kásibıligin arttyrýǵa jáne zamanaýı tehnologııalardy engizýge baǵyttalǵan.

Budan buryn 15 qyrkúıekten bastap respýblıkalyq mańyzy bar aqyly avtojoldarda tólem erejeleri ózgergenin jazdyq.