Jol qurylysyna jańa talap: qadaǵalaýshy mamandar jaýapkershilikke tartylatyn bolady
ASTANA. KAZINFORM — Qazaqstanda avtojoldardy salý jáne paıdalaný salasyndaǵy zańnamany jetildirý boıynsha júıeli jumys jalǵasady. Bul týraly Kólik mınıstrligi málim etti.
Onyń mańyzdy baǵyttarynyń biri — jol qurylysy jumystary barysynda tehnıkalyq jáne avtorlyq qadaǵalaý talaptarynyń kúsheıtilýi.
— Endi avtojoldardyń qurylysy men jóndeýin qadaǵalaıtyn uıymdar jol qurylysy salasyndaǵy kásibı mamandardy shtatqa alýǵa mindetti. Buǵan deıin akkredıtatsııa alý kezinde bul talap mindetti bolyp sanalmaǵan. Jańa ózgeris baqylaý sapasyn arttyrýǵa jáne jol jóndeý jumystarynyń qoldanystaǵy normatıvter men standarttarǵa saı bolýyn qamtamasyz etýge baǵyttalǵan, - delingen habarlamada.
Sonymen qatar, qadaǵalaýshy mamandardyń quqyqtyq jaýapkershiligi de kúsheıtildi. «Sybaılas jemqorlyqqa qarsy is-qımyl týraly» Zańnyń 1-babyna engizilgen túzetýlerge sáıkes, tehnıkalyq jáne avtorlyq qadaǵalaý júrgizetin tulǵalar memlekettik fýnktsııalardy oryndaýǵa ýákiletti adamdarǵa teńestirildi. Bul olardyń qyzmetin tıisinshe oryndamaǵan jaǵdaıda qylmystyq jaýapkershilikke tartylatynyn bildiredi.
Qabyldanǵan sharalar elimizdiń avtojol ınfraqurylymynyń sapasyn arttyrýda mańyzdy kezeń bolmaq.
Aıta keteıik, Aqtóbede jol qurylysyna qatysty 20-dan astam is sotta qaralyp jatyr.