«AvtoJol+» baǵdarlamasy iske qosylǵany ras pa — mınıstrlik túsinikteme berdi
ASTANA. KAZINFORM — Ónerkásip jáne qurylys mınıstrligi ınternet keńistiginde tarap jatqan «AvtoJol+» jeńildetilgen avtonesıeleý baǵdarlamasy týraly aqparat shyndyqqa sáıkes kelmeıtinin resmı túrde málimdeıdi.
— Mınıstrlik bul habarlamada kórsetilgen sharttar boıynsha (avtokólik qunynyń 10%-dan 50%-ǵa deıingi bóligi sýbsıdııalanady, nesıeniń jyldyq mólsherlemesi 2%-dan bastalady, bastapqy jarna talap etilmeıdi jáne t. b.) eshqandaı resmı bastama nemese baǵdarlama jarııalaǵan joq. Atalǵan aqparat shyndyqqa janaspaıdy jáne onyń alaıaqtyq maqsatta jasalǵan bolýy múmkin ekendigin eskertemiz, — delingen vedomstvo taratqan aqparatta.
Mınıstrlik azamattardy muqııat bolýǵa shaqyrady:
-
Kúmándi siltemelerge ótpeńizder;
-
Jeke derekterińizdi tekserilmegen, beıresmı saıttarǵa engizbeńizder;
-
Aqparatty tek mınıstrliktiń resmı ınternet-resýrstary men áleýmettik jelidegi paraqshalarynan alyńyzdar.
Budan buryn WhatsApp, Telegram jáne basqa da sheteldik messendjerlerdi qoldanýǵa tyıym salynady degen jalǵan aqparat taraǵanyn jazǵanbyz.