«Avtoýragan» arqyly 23 mıllıon teńge óndirildi - OQO
ShYMKENT. QazAqparat - Ońtústik Qazaqstan oblysynda tártip saqshylary kólik salyǵyn óndirýdiń tyń tásiline kóship, buǵan deıin salyq jáne aıyppul tóleýden jaltaryp júrgenderden 23 mıllıon teńge óndirildi.
Bul týraly oblystyq ishki ister departamentiniń resmı ókili Saltanat Qarakózova málim etti, dep habarlaıdy QazAqparat tilshisi.
Polıtseıler osynshama qarajatty «Avtoýragan» jyljymaly keshenin paıdalaný arqyly júzege asyrǵan. Munan bólek, aıyppuly bar 1000-nan astam mashına aıypturaqqa jóneltilgen.
«Avtoýragan» jyljymaly kesheni jol júrý erejesin buzýshylardy anyqtaýda polıtseılerdiń jumysyn jeńildetip otyr. Egerde jol-patrýldik polıtsııa qyzmetkerleri aıyppuldardy tólemegen júrgizýshini anyqtaý maqsatynda qatarynan birneshe kólikti toqtatý kerek bolsa, bul is «Avtoýragan» arqyly jyldam júzege asady. Atap aıtsaq, arnaıy baza arqyly aıyppul tólemegen júrgizýshilerdiń kóliginiń memlekettik nómirlerin anyqtap, polıtsııa qyzmetkerlerine habarlap, olar óz kezeginde anyqtalǵan kólikti toqtatady,-deıdi departamentiń resmı ókili.
Qazirgi tańda OQO ІІD Jergilikti polıtsııa qyzmetiniń qoldanysyndaǵy 2 «Avtoýragan» jyljymaly kesheni oblys ortalyǵynyń joldarynda qyzmet etýde.
Almas Sultan
