Avtotýrısterge keńes: Ulttyq parkke kirgende kidiristen qalaı saqtanýǵa bolady
ASTANA. KAZINFORM — Mamyr aıyndaǵy merekeler qarsańynda «Býrabaı» memlekettik ulttyq tabıǵı parki (MUTP) dırektsııasy kelýshilerge ýaqyt únemdeýge jáne park aýmaǵynan shyqqanǵa deıin tólem jasaý múmkindigin paıdalanýǵa keńes beredi.
— Ulttyq park aýmaǵynan shyǵar kezde uzaq kidirip qalmaý úshin, BÓP kameralary kóliginińizdiń nómirin tirkegennen keıin parkqa kelý tólemin aldyn ala tóleýińizdi suraımyz. Qonaqtarǵa yńǵaıly jaǵdaı jasaý úshin Ulttyq parktiń adamdar eń jıi baratyn jerlerinde onlaın tólem jasaýǵa arnalǵan QR-kodtar ornatylǵan. Bul QR-kodtar parktyń barlyq 5 baqylaý-ótkizý pýnktinde, Abylaı han alańynda, Bólektaý, Kógildir shyǵanaq, Oqjetpes pen «Ulýtas» mańyndaǵy turaqtarda ornalasqan, ne bolmasa Kaspi.kz nemese Homebank bankteriniń mobıldi qosymshalaryndaǵy «Tólemder» bóliminen «Kólik» — «Býrabaı ulttyq parki. Kirý úshin tólem» qyzmetin tańdap, aldyn ala tólem jasaýyńyzdy suraımyz. Tólem sol kúni túngi 00:00–ge deıin jaramdy. Demalysty aldyn ala josparlap, yńǵaıly tólem tásilderin qoldanyp, kepteliste ýaqyt joǵaltpańyz! — dep eskertti ulttyq tabıǵı park baspasóz qyzmeti.
Sonymen qatar, 1 mamyr men 30 qyrkúıek aralyǵynda demalys pen mereke kúnderi kirý aqysy tómendegideı bolady:
· jeńil avtokólik — 0,4 AEK (1573 teńge);
· syıymdylyǵy 16 orynǵa deıingi shaǵyn avtobýs pen júk kóligi — 1,5 AEK (5898 teńge);
· 32 orynǵa deıingi avtobýs — 2,5 AEK (9830 teńge);
· 32 orynnan kóp avtobýs — 3,5 AEK (13762 teńge).
Myna kólik quraldarynan tabıǵat qorǵaý mekemesi aýmaǵyna kirgeni úshin tólem alynbaıdy:
· elektromobılder;
· jolaýshylardy turaqty tasymaldaýmen aınalysatyn avtobýstar;
· zeınetkerlerdiń, múmkindigi shekteýli jandardyń, Uly Otan soǵysynyń jáne basqa memleketter aýmaǵyndaǵy jaýyngerlik is-qımyldardyń ardagerleriniń, UOS ardagerlerine teńestirilgen tulǵalardyń, eńbek ardagerleriniń kólikteri;
· qyzmettik mindetin atqaryp júrgen arnaıy kólikter: jedel járdem, qutqarý qyzmetteri, quqyq qorǵaý organdary jáne t. b.;
· aýyl sharýashylyǵy men melıoratsııalyq tehnıkalar;
· Ulttyq park pen onyń qorǵaý aımaǵy shekarasynda turatyn, osy aýmaqta tirkelgen turǵyndardyń kólikteri.
Buǵan deıin Býrabaı kýrortyn damytý josparyna 137 mıllıard teńge bólingeni málim boldy.