Avtoturaq aqysyn tóleýden jaltarǵandarǵa aıyppuldy alyp tastaý týraly petıtsııa jarııalandy
ASTANA. KAZINFORM – Qazaqstandyqtar avtoturaq aqysyn tólemegeni úshin salynatyn aıyppulǵa qarsy. Oǵan qatysty petıtsııa Epetition.kz saıtynda 27 tamyzǵa deıin qoljetimdi.
«Avtoturaq aqysyn tóleýdiń qoldanystaǵy tetigi halyq arasynda qıyndyqtar men túsinispeýshilikter týǵyzady. Eń qıyny avtoturaq aqysyn sol sátte (tólem Kaspi arqyly júrgizilse) nemese sol kúni saǵat 23:59-ǵa deıin (tólem qosymsha arqyly jasalsa) tóleý kerek. Ýaqtyly tólemegen jaǵdaıda ákimshilik aıyppul salynady, onyń somasy avtoturaq aqysynan edáýir joǵary. Aıta ketetin jaıt, kólik ıeleri avtoturaq aqysyn tóleýden qashpaıdy, olar úlgermeıdi, umytyp ketedi nemese avtoturaqtyń aqyly ekenin bilmeıdi», - delingen petıtsııa mátininde.
Petıtsııa avtorlarynyń aıtýynsha, qazir qalalarda tegin avtoturaqtar qalmaǵan.
«Aýrýhanalardyń, mektepterdiń, balabaqshalardyń jáne saýda ortalyqtarynyń avtoturaqtary aqyly, bul kólik ıeleri úshin qosymsha qıyndyq. Astana qalasy ákimdigine avtoturaqtardyń aqysyn tóleý tetigin qaıta qaraý týraly usynysymyz jónine qaldy. Sonymen qatar aqyly joldar (QazAvtoJol) boıynsha aldyn ala tóleýdi, sondaı-aq tólemge shot qoıýdy jáne tólem jasalmaǵan jaǵdaıda habarlamalar jiberýdi kózdeıtin tetikter usyndyq. Bul tásil jol aqysyna qatysty janjaldardy azaıtyp, qala turǵyndary úshin qolaıly jaǵdaı jasaı otyryp, turaq aqysyn tóleýdiń ıkemdi jáne yńǵaıly ádisin qamtamasyz etedi. Sol sııaqty avtoturaq aqysyn tóleý mehanızmine kóshý qaladaǵy turaq keńistigin tıimdi paıdalanýǵa yqpal ete otyryp, júıeni azamattar úshin ashyq, ádil jáne túsinikti etedi. Usynylǵan ıdeıa perspektıvaly bolyp kórinedi jáne ony iske asyrý qala turǵyndary arasyndaǵy áleýmettik shıelenisti tómendetýge áleýeti bar», - deıdi petıtsııa avtorlary.
Búginde elorda ákimdiginiń jergilikti bıýdjetine avtoturaqtardan keletin túsimder somasy 5 mlrd teńgeden asady eken.
«Alaıda, bul qarajattyń qalaı paıdalanylatyny qala turǵyndary úshin túsiniksiz. Aqyly avtoturaq ıeleri óz múddesin ǵana qorǵaıdy, bul halyqtyń esebinen negizsiz baıýǵa ákeledi. Bul máseleniń jalǵyz sheshimi «Ákimshilik quqyq buzýshylyq týraly» QR Kodeksiniń 597-babynyń 4-1 jáne 4-2-tarmaqtaryn alyp tastaý. Atap aıtqanda, respýblıkalyq mańyzy bar qalalardyń jáne elordanyń jergilikti atqarýshy organdary aıqyndaǵan kólik quraldaryn turaqqa qoıý úshin aqy alýǵa jáne turaqqa qoıý ýaqytyn esepke alýǵa arnalǵan arnaıy sertıfıkattalǵan qurylǵylarmen jabdyqtalǵan oryndarda turaq úshin aqy tóleýden jaltarý úsh aılyq eseptik kórsetkish mólsherinde aıyppul salýǵa ákep soǵady. Osy baptyń 4-1-bóliginde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan is-áreket bes aılyq eseptik kórsetkish mólsherinde aıyppulǵa ákeledi. Bul talaptardy alyp tastaý qala turǵyndarynyń múddelerine sáıkes keletin jáne qalalyq turaq keńistigin tıimdi paıdalanýǵa yqpal etetin turaq aqysyn tóleýdiń neǵurlym ádil jáne ashyq júıesin qurýǵa múmkindik beredi», - dep tolyqtyrylǵan.
Búginde ÁQBtK-niń 597-babynyń 4-1 jáne 4-2-bólikterin alyp tastaý jónindegi túzetýlerdi kózdeıtin «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» QR Zańynyń jobasy Májilistiń qaraýynda.
