Qostanaıda merdigerdiń nemquraılyǵynan aýyl turǵyny kóz jumdy

QOSTANAI. KAZINFORM — Qostanaı oblysy Beıimbet Maılın aýdanynyń sotynda sý qubyry jelilerin jóndeýmen aınalysqan merdiger uıymnyń prorabyna qatysty is qaraldy. Qurylys jetekshisiniń nemquraılyǵyna baılanysty jolaı ótip bara jatqan áıel qorshalmaǵan shuńqyrǵa qulaǵan. Ol alǵan jaraqatynan qaıtys boldy.

Habarlanǵandaı, áıel qarańǵyda velosıpedpen ketip bara jatqan. Shuńqyr arnaıy qorshaýmen, topyraqpen qorshalmaǵan, sonymen qatar tóńiregi jaryqtandyrylmaǵan.

Sóıtip aýyl turǵyny shuńqyrǵa qulaǵan. Ol aýdandyq aýrýhanaǵa jatqyzyldy, biraq ókinishke oraı qaıtys boldy.

Aıyptaýshy tarap shartty túrde 3 jylǵa sottaýdy surady.

— Sottalýshy S. kinásin tolyq moıyndady, shyn júrekten ókinish bildirdi. Іs boıynsha aýyrlatatyn mán-jaı anyqtalǵan joq. Sot úkimimen S. kináli dep tanyldy jáne oǵan QK 63-babyn qoldana otyryp, 3 jyl merzimge shartty jaza taǵaıyndaldy, — dep málimdedi oblystyq sottyń baspasóz qyzmeti.

Úkim zańdy kúshine engen joq.