Avtosaıahat maýsymy: merekelik demalysta turǵyndar qaı baǵytpen kóp júrgeni belgili boldy
ASTANA.KAZINFORM - 4–6 shilde aralyǵyndaǵy merekelik demalys kúnderi qazaqstandyqtardyń avtomobılmen saıahattaýdy belsendi tańdaıtynyn kórsetti. Úsh kún ishinde respýblıkalyq mańyzy bar avtomobıl joldarynda 3,9 mln-nan astam jol júrý tirkeldi.
QazAvtoJol málimetinshe, bul statıstıka biregeı týrısterdiń naqty sanyn kórsetpeıdi. Degenmen demalys kúnderi qaı baǵyttardyń eń suranysqa ıe bolǵanyn aıqyn ańǵartady.
Kólik aǵyny boıynsha Shymkent – Qyzylorda ýchaskesi kósh bastady. Úsh kún ishinde bul baǵytta 442 056 jol júrý tirkeldi. Ońtústik baǵyt dástúrli túrde eń qarqyndy baǵyttardyń biri sanalady. Jaz mezgilinde munda qalaaralyq qatynas ta, demalys oryndaryna, saıajaılarǵa, týystarǵa jáne týrıstik marshrýttarǵa baratyn kólik legi de artady.
Ekinshi orynda – Astana – Şýchınsk baǵyty. Bul ýchaskede 386 164 jol júrý tirkeldi. Atalǵan kórsetkish Býrabaı kýrorttyq aımaǵy elorda turǵyndary úshin demalys kúnderindegi negizgi baǵyttardyń biri bolyp qala beretinin kórsetedi. Úzdik úshtikke Taraz – Qaınar ýchaskesi de endi. Munda 324 863 jol júrý tirkelgen. Sonymen qatar Shymkent – Taraz baǵytynda 303 800, Shymkent – Ózbekstan shekarasy ýchaskesinde 269 750 jol júrý tirkeldi.
Almaty mańyndaǵy tanymal demalys baǵyttarynda da qozǵalys qarqyny joǵary boldy. Almaty – Qonaev ýchaskesinde 306 966 jol júrý tirkeldi. Sondaı-aq Almaty – Qorǵas baǵyty boıynsha 197 499, Qonaev – Taldyqorǵan ýchaskesinde 194 119 jol júrý anyqtaldy. Shyǵys baǵyttar da belsendi paıdalanyldy.
Pavlodar – Semeı – Qalbataý baǵyty boıynsha úsh kúnde 198 930 jol júrý tirkeldi. Budan bólek, Astana – Temirtaý ýchaskesinde 227 477 jáne Astana – Pavlodar baǵytynda 217 888 jol júrý tirkelgen. Jalpy, merekelik demalys kúnderi el ishinde demalysqa jıi tańdalǵan úsh negizgi baǵytty kórsetti. Olar – eldiń ońtústigi, Býrabaı baǵyty jáne Almatydan Qonaev, Taldyqorǵan men Qorǵasqa shyǵatyn baǵyttar.
Ońtústik jáne ońtústik-batys dálizderine 1,5 mln-nan astam jol júrý nemese jalpy kólemniń shamamen 40 paıyzy tıesili boldy. Astana jáne soltústik óńirlermen baılanysty baǵyttarda 957 myńǵa jýyq, al Almaty baǵytynda 735 myńnan astam jol júrý tirkeldi. Bul dınamıka avtomobıl joldary ishki týrızmniń negizgi quraldarynyń biri bolyp qala beretinin kórsetedi. Qazaqstandyqtar qysqa saparlar, tabıǵat aıasyndaǵy demalys, sý jaǵasyna barý jáne kýrorttyq aımaqtarǵa qatynaý úshin jeke kólikti jıi tańdaıdy.
«QazAvtoJol» ulttyq kompanııasy júrgizýshilerge alys jolǵa shyǵar aldynda baǵytty aldyn ala josparlaý, jyldamdyq rejımin saqtaý, aýa raıy jaǵdaıyn eskerý jáne jolda demalys úzilisterin jasaý mańyzdy ekenin eske saldy.
Aqyly joldarǵa qatysty suraqtar boıynsha táýlik boıy jumys isteıtin 1403 baılanys ortalyǵyna habarlasýǵa bolady.
Elimizde 10 shildeden bastap birqatar avtojol aqyly bolatynyn jazǵan edik.
