Avtosalonnan satyp alynǵan kólikti onlaın tirkeý engiziledi
ASTANA. KAZINFORM – Qazaqstanda eGov memlekettik portalynda jańa avtokólikterdi onlaın tirkeý júıesi iske qosylmaq. Tıisti qujat jobasy «Ashyq NQA» portalynda jarııalandy.
Tsıfrlyq damý, ınnovatsııalar jáne aeroǵarysh ónerkásibi mınıstrligi kólikti alǵashqy memlekettik tirkeýdi «elektrondyq úkimet» portaly jáne aqparattandyrý obektileri arqyly júrgizý jónindegi pılottyq jobany iske asyrý týraly buıryq jobasyn ázirledi.
Portal arqyly kelesi memlekettik qyzmet túrleri kórsetiledi:
- avtokólikti sáıkestendirý nómiri boıynsha jeke memlekettik tirkeý, esepke qoıý jáne esepten shyǵarý;
- avtokólikti tirkeý týraly kýálik pen memlekettik tirkeý nómirin berý.
Qujat jobasy 2025 jylǵy 2 qyrkúıekke deıin qoǵamdyq talqylaýǵa usynylyp otyr.
Ulttyq statıstıka bıýrosynyń málimetine sáıkes, bıyl shildede 169,9 myń avtokólik esepke qoıyldy, osylaısha 2025 jylǵy 1 tamyzdaǵy jaǵdaı boıynsha Qazaqstanda tirkelgen avtokólik quraldarynyń sany 6 629 myń boldy.