Avtosaqtandyrý qunynyń ósýi: júrgizýshiler ne utady, neden utylady

ASTANA.KAZINFORM – Kólik júrgizýshilerin alańdatqan ózekti taqyryptyń biri – avtosaqtandyrý júıesi. Májiliste avtosaqtandyrý kompanııalary tóleıtin ótemaqy kólemin arttyrýdy kózdeıtin jańa bastama talqylanyp jatyr. Osyǵan baılanysty táýelsiz avtosarapshy Sanat Nurbaı usynylyp otyrǵan ózgeristerdiń máni men yqtımal saldaryn túsindirdi.

Onyń aıtýynsha, bul másele burynnan beri kóterilip keledi. Qazirgi qoldanystaǵy mindetti avtosaqtandyrý boıynsha eń joǵarǵy ótemaqy mólsheri – shamamen 2 mıllıon 350 myń teńge.

– Qazir bir kóliktiń aldyńǵy qosalqy bólshekteriniń ózi 2 mıllıon teńgeden asyp ketýi múmkin. Al aýyr jol-kólik oqıǵasy bolǵan jaǵdaıda bul soma túkke turmaı qalady. Qalǵan shyǵyndy júrgizýshi óz qaltasynan tóleýge májbúr, – deıdi ol Jibek Joly telearnasynyń «Bugin LIVE» baǵdarlamasynda.

Onyń sózinshe, eger ótemaqy kólemi eki esege artsa, kólik ıesi barlyq shyǵynyn tolyq ótemese de, kem degende zalaldyń bir bóligin jabýǵa múmkindik alady. Sebebi qosalqy bólshekter de, kóliktiń ózi de qymbattaǵan.

Sarapshy jol apatyndaǵy adam shyǵynyna da erekshe toqtaldy. 

Resmı statıstıkaǵa sáıkes, jyl saıyn Qazaqstanda shamamen 2 myńǵa jýyq adam jol apatynan qaza bolady.

– Zań boıynsha bir adam mert bolǵan jaǵdaıda saqtandyrý kompanııasy 7 mıllıon teńge tóleýge mindetti. Biraq sol 2 myń adamnyń barlyǵy bul ótemaqyny aldy ma, almady ma – ol jaǵy belgisiz. Halyq zańdy bile bermeıdi, – deıdi Canat Nurbaı.

Degenmen, bul ózgeristerdiń ekinshi jaǵy da bar.

– Eger júrgizýshi tájirıbeli bolyp, jol apatyna túspese de, jyl saıyn saqtandyrý kompanııasyna 25-30 myńnan 100-110 myń teńgege deıin tóleýge mindetti bolady. Meniń oıymsha, apatqa túspegen júrgizýshilerge saqtandyrý kompanııalary kem degende 50 paıyzyn qaıtarýy kerek, – dedi sarapshy.

Onyń aıtýynsha, búginde elde 25-ke jýyq saqtandyrý kompanııasy bar, olardyń jyldyq tabysy 223 mıllıard teńgege jetedi. Al birneshe kóligi bar azamattar jyl saıyn mindetti túrde saqtandyrý polısin satyp alady.

Sanat Nurbaı saqtandyrý kompanııalarynyń onlaın formatqa tolyq kóshýin de synady. 

Onyń aıtýynsha, saıttardyń jıi istemeı qalýy azamattarǵa qolaısyzdyq týdyrady, sondyqtan oflaın qyzmet kórsetý mindettelýi tıis.

Sonymen qatar, sarapshy KASKO saqtandyrýynyń ereksheligine toqtaldy. Ol jol apatynan keıin kólik jaramsyz bolyp qalsa nemese urlansa, shyǵynnyń 99 paıyzyna deıin óteletinin aıtady. Alaıda kelisimshartty muqııat oqý qajettigin eskertti.

Aıta keteıik, buǵan deıin Memleket basshysy Qasym-Jomart Toqaev elordada jol-kólik oqıǵalarynyń kóbeıgenine alańdaýshylyq bildirgeni jaıly jazyp edik.