Avtorlyq quqyq salasyndaǵy Biryńǵaı tsıfrlyq platforma qalaı jumys isteıdi
ASTANA. KAZINFORM — Elimizde avtorlyq jáne sabaqtas quqyqtardy ujymdyq basqarý salasyndaǵy protsesterdi ashyq júrgizý úshin Biryńǵaı tsıfrlyq platforma (BTsP) engizilip jatyr. Bul týraly Ortalyq kommýnıkatsııalar qyzmetinde ótken brıfıngte QR Ádilet vıtse-mınıstri Botagóz Jaqselekova aıtty.
Biryńǵaı tsıfrlyq platformany qurý zııatkerlik menshik salasynda buǵan deıin jınaqtalǵan birqatar máseleni sheshýge baǵyttalǵan. Sonyń ishinde týyndylardyń paıdalanylýyn esepke alý, avtorlyq syıaqyny jınaý, bólý jáne tóleý protsesteriniń ashyqtyǵyn qamtamasyz etý kózdelgen.
— Buǵan deıin qoldanysta bolǵan tetikter týyndylardyń qalaı paıdalanylǵanyn, avtorlyq syıaqynyń qalaı jınalyp, bólingenin tolyq baqylaýǵa múmkindik bermedi. Sonymen qatar ákimshilik shyǵyndar joǵary bolyp, barlyq avtor men týyndyny paıdalanýshylardy esepke alý jáne týyndylardyń naqty paıdalanylǵanyn tirkeý qıyndyq týǵyzdy, — dedi vıtse-mınıstr.
Onyń aıtýynsha, platforma engizilgenge deıin protsesterdiń edáýir bóligi qaǵaz túrinde júrgizilgen. Atap aıtqanda, shart jasasý, týyndylardy paıdalaný týraly esep usyný jáne basqa da rásimder qaǵaz júzinde atqaryldy. Jekelegen jaǵdaıda avtorlyq syıaqy qolma-qol aqshamen de tólengen.
— BTsP bul protsesterdi tsıfrlyq formatqa kóshirip, kezeń-kezeńimen avtomattandyrýǵa múmkindik beredi. Platforma avtorlar men quqyq ıelenýshilerdi, quqyqtardy ujymdyq basqarý jónindegi uıymdar men týyndylardy paıdalanýshylardy bir tsıfrlyq ortada biriktiredi, — dedi spıker.
Osylaısha, onyń aıtýynsha, avtorlar men quqyq ıelenýshiler óz týyndylarynyń paıdalanylýy jáne olarǵa tıesili syıaqy týraly aqparatqa qol jetkize alady. Platformada shart jasasý, týyndylardy paıdalaný esebin júrgizý, eseptilik usyný, syıaqyny bólý jáne tóleý protsesteri avtomattandyrylady.
BTsP-nyń 2027 jylǵy 1 qańtarǵa qaraı tolyq rejımde jumys isteýin qamtamasyz etý josparlanyp otyr.
Aıta keteıik, buǵan deıin Oqý-aǵartý mınıstri Juldyz Súleımenova Qazaqstannyń álemdik zııatkerlik báseke alańyna aınalyp kele jatqanyn aıtqan edi.
