Avtorlyq qoǵamdar kompozıtorlardyń quqyǵyn buzyp otyr - depýtat

ASTANA. KAZINFORM — Búgin Májilistiń jalpy otyrysynda depýtat Nartaı Sársenǵalıev avtorlyq qoǵamdarǵa qatysty máseleni kóterdi.

Aıta keteıik, palatanyń otyrysynda «Qazaqstan Respýblıkasynyń keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanyp jatyr.

- Elimizde 15 avtorlyq qoǵam bar. Biraq olar avtorlardyń quqyǵyn óte qatty buzyp otyr. Máselen, avtordyń shyǵarmasy oryndalady jáne sol úshin avtorlyq qoǵamǵa aqsha túsedi. Osy aqshanyń 70 paıyzy atalǵan qoǵamda qalsa, 30 paıyzy avtordyń ózine barady. Naqty derekke toqtalsaq, 2023 jyly ujymdyq avtorlyq basqarý uıymdaryna elimizde 1 mlrd 550 mln teńge túsken. Sonyń ishinde 439 mln teńgesi ǵana avtorlarǵa barǵan, ıaǵnı úshten bir bóligi. Dál osy zańsyzdyqty qashan túzeısizder? Óıtkeni, Shámshi Qaldaıaqovtyń 55 ánin oryndaǵany úshin avtorlyq qoǵamdar úsh aıda kompozıtordyń urpaǵyna 22 myń teńge tólegen, qazir ol soma 18 myń teńgege túsip ketti. Ekinshiden, osy zańnyń 39-babyna qarasaq, fonogrammany efırge bergender jáne sol fonogrammany retranslıatsııa jasaǵandar endi fonogrammany jasaýshylar men oryndaýshylarǵa taǵy syıaqy tóleý kerek dep kórsetilgen. Depýtattar fonogrammany joıý kerek dep kúresip otyr. Al sizder syıaqy tóleýdi qamtyǵansyzdar. Bul qalaı bolǵany?! Osy tetik fonogrammany jasaýshylardy odan ári jasandy mýzykaǵa ıtermeleıdi, - dedi N. Sársenǵalıev.

Óz kezeginde Ádilet mınıstri Erlan Sársembaev bul másele óte kúrdeli ekenin rastady.

- Osy máseleni sheshý úshin eki qadam kerek. Birinshiden, zańgerlik jaǵynan tıisti zańdarǵa ózgeris engizý kerek. Ekinshiden, uıymdastyrý jaǵyn qamtý qajet. Biz tıisti platformany ázirlep jatyrmyz, ony kúzge deıin daıarlaımyz. Búgin Májiliste qaralyp jatqan zań jobasy tolyq qabyldanyp, Prezıdent qol qoıǵanǵa deıin Ádilet mınıstrligi uıymdastyrý jaǵyn qamtamasyz etedi dep sanaımyn. Osy oraıda atalǵan máselege qatysty tıisti sheshim jasalady. Al fonogramma máselesine toqtalsam, zań jobasyn ekinshi oqylymǵa deıin jumys tobynyń otyrysynda pysyqtaýǵa múmkindik bar, - dedi Ádilet mınıstr.

Eske salsaq, byltyr kúzde Májiliste keratıvti ındýstrııany damytý jóninde ótip jatqan jıynda avtorlyq quqyq salasyndaǵy sarapshy Temirlan Tólegenov shyǵarmashylyq adamdary óz talantyn aqshaǵa aınaldyrýǵa ıkemsiz ekenin aıtty.