Avtordan ádebı týyndyny belgili bir merzimge ǵana satyp alý talaby engiziledi - mınıstr

NUR-SULTAN. QazAqparat – Avtordan qoǵamdyq mańyzy bar ádebıetti belgili bir merzimge ǵana satyp alý engiziledi. Bul týraly Májilistiń jalpy otyrysynda QR Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.

«2017 jyly depýtattyq korpýstyń arqasynda alǵash ret zańnamalyq deńgeıde avtorlarǵa qoǵamdyq mańyzy bar ádebıet úshin qalamaqy tóleý tájirıbesi engizildi. Bul basqa elderde bolmaǵan jaǵdaı. Alaıda, is júzinde qaıshylyqtar paıda boldy. Atap aıtqanda, avtordan ádebıetterdi satyp alý avtorlyq quqyqtyń barlyq merzimine memleketke avtorlyq quqyqty berýdi kózdeıdi. Ol - avtordyń ómir súrgen kezindegi merzim jáne odan keıingi 70 jyl. Bul turǵyda memleket ádebıetti ony memlekettik kitaphanalarǵa óteýsiz negizde taratý úshin ǵana satyp alatynyn aıta ketken jón», - dedi mınıstr «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda.

Onyń aıtýynsha, óz kezeginde avtordyń týyndysyn qaıta shyǵarýǵa nemese kitap dúkenderine satýǵa nemese ony basqa joldar arqyly satýǵa quqy joq. Bul jaǵdaıda memlekettiń halyqqa mádenı ónimniń qoljetimdiligin qamtamasyz etý jónindegi mindeti oryndalmaıdy, kerisinshe shektelip otyr.

«Osyǵan oraı, jobada elimizdiń kitaphanalaryna ádebıetti basyp shyǵarý jáne taratý maqsatynda avtordan ádebıetterdi belgili bir merzimge satyp alý qarastyrylyp otyr. Odan ári, avtor ony basyp shyǵarýǵa jáne Qazaqstan Respýblıkasynyń zańdarymen tyıym salynbaǵan kez kelgen basqa joldarmen taratýǵa quqyly bolady», - dedi Aqtoty Raıymqulova.