Avtoónerkásiptegi daǵdarys Germanııany tyǵyryqqa tiredi

ASTANA. KAZINFORM — Germanııanyń avtoónerkásip alpaýyttarynyń paıdasy 2009 jyldan bergi eń tómengi deńgeıge tústi, dep habarlaıdy BILD.

Germanııanyń avtokólik ónerkásibi sońǵy 15 jyldaǵy eń aýyr toqsandy bastan ótkerip otyr. EY konsaltıngtik kompanııasynyń taldaýyna sáıkes, shilde men qyrkúıek aralyǵynda Volkswagen, BMW jáne Mercedes-Benz kompanııalarynyń operatsııalyq paıdasy birden 76%-ǵa quldyrap, shamamen 1,7 mlrd eýro boldy.

Bul 2009 jyldan bergi eń tómengi kórsetkish. Al jalpy tabys pen satylym kólemi salystyrmaly túrde turaqty bolyp qalǵan. Іri avtokólik óndirisi bar birde-bir el mundaı tómen nátıje kórsetken joq.

Eń aýyr soqqy Qytaı naryǵyna tıdi. Uzaq jyl boıy nemis avtokólik brendteriniń negizgi tiregi bolyp kelgen bul elde satylym 9%-ǵa tómendedi. Qytaıdyń jalpy satý qurylymyndaǵy úlesi burynǵy 39%-dan 29%-ǵa deıin qysqardy. Premıým segmenttegi modelder nashar satylyp jatyr, al elektromobılder naryǵynda tutynýshylar jergilikti óndirýshilerdi jıi tańdaı bastady.

— Álemdik avtoónerkásip tereń daǵdarys kezeńinde tur, alaıda qazirgi tańda eń kóp zardap shegip otyrǵan nemis avtokontsernderi, — dep málimdedi BILD basylymyna bergen suhbatynda EY kompanııasynyń avtoónerkásip jónindegi sarapshysy Konstantın Gall.

Germanııanyń ózinde Bosch, Mercedes jáne Volkswagen kompanııalary qyzmetkerlerdi qysqartý týraly jarııalap úlgerdi. EY sarapshylary mundaı qadamdy aýyr, biraq amalsyz shara dep baǵalaıdy.

— Jumys oryndaryn qysqartý — aýyr sheshim, alaıda uzaq merzimdi perspektıvada bul kompanııalardyń básekege qabilettiligin arttyrady, — dep túıindedi Gall. 

Aıta ketelik Germanııada jańa jyldan bastap mindetti medıtsınalyq saqtandyrý qymbattaıtyny týraly jazǵan edik.