Avtoónerkásiptiń jergilikti qamtý deńgeıi 33 paıyzǵa jetti

NUR-SULTAN. QazAqparat – Elimizde avtoónerkásiptiń jergilikti qamtý deńgeıi 33 paıyzǵa jetip otyr. Bul týraly QR Indýstrııa jáne ınfraqurylymdyq damý mınıstrligi Indýstrıaldyq damý komıteti tóraǵasynyń orynbasary Oljas Saparbekov málim etti, dep habarlaıdy QazAqparat tilshisi.

«Ortasha eseppen alǵanda Qazaqstanda avtoónerkásiptiń jergilikti qamtý úlesi 33, tipti keıbir modelde 50 paıyzǵa deıin jetedi», - dedi ol ortalyq kommýnıkatsııalar qyzmetindegi baspasóz máslıhatynda.

Spıkerdiń atap ótýinshe, «jergilikti qamtý» men «jergiliktendirý» túsiniginiń ara-jigin ajyrata bilý qajet.

«Jergilikti qamtý úlesin esepteýdiń bekitilgen ádistemesi bar. Onda quramdyq baza ǵana emes, sonymen birge Qazaqstanda qalatyn qosylǵan qun – avtomobıldi qurastyrýǵa tólenetin jumysshylardyń jalaqysy men ózge de qyzmetter esepke alynady. Jergiliktendirý tehnologııalar men ózge de protsesterdi ıgerý, onyń ishinde dánekerleý, boıaý, qurastyrý esebinen júzege asyrylady. Shaǵyn torapty jınaq shamamen bir myń operatsııadan turady. Búginde biz jańa kezeńge kóship jatyrmyz. Konponentter óndirisin damytý boıynsha qosymsha mindettemeler bar», - dedi Oljas Saparbekov.

Onyń sózine qaraǵanda, qazirdiń ózinde elimizde shyǵarylatyn alıýmınıı dıskiler, plastık detaldar, sý jáne maı sorǵylary, matordyń astyńǵy jaqtaýy tehnıkalarǵa ornatylyp jatyr.