Avtoóndirýshilerdi lızıngti qarjylandyrý erejesinen básekelestikke qarsy normalar alynyp tastalady
QR Básekelestikti qorǵaý jáne damytý agenttigi «QazAvtoProm «Qazaqstannyń avtomobıl salasy kásiporyndarynyń odaǵy« ZTB ótinishin qaraý nátıjesi boıynsha QR Indýstrııa jáne ınfraqurylymdyq damý mınıstrligine jáne «Ónerkásipti damytý qory» AQ-ǵa qoldanystaǵy baǵdarlamalardan jáne otandyq avtoóndirýshilerdi lızıngti qarjylandyrý erejelerinen básekelestikke qarsy normalardy alyp tastaý týraly nusqama engizdi.
«Qazirgi ýaqytta otandyq avtoóndirýshilerdi qarjylandyrý maqsatynda QR Indýstrııa jáne ınfraqurylymdyq damý mınıstrligi (IIDM) bekitken «Báıterek «UBH «AQ kredıtteý» qarjylyq-ekonomıkalyq negizdeme baǵdarlamasy boıynsha «Ónerkásipti damytý qory» AQ (buryn – «QDB-lızıng» AQ) kredıtteý júrgizýde. Osy baǵdarlamada aıqyndalǵan qarjylandyrý tetigine sáıkes Qazaqstandyq avtobıznes qaýymdastyǵy (QABQ) árbir avtoóndirýshige lızıngtik qarjylandyrý kezindegi lımıtter somasyn aıqyndaıdy», delingen habarlamada.
Vedomstvonyń málimdeýinshe, osyǵan uqsas normalar «Ónerkásipti damytý qory» AQ-nyń otandyq avtomobılder óndirisin qoldaý boıynsha lızıngtik qarjylandyrý baǵdarlamasynda jazylǵan. Bul rette QABQ – quramyna avto óndirý naryǵynda jumys isteıtin kásiporyndardyń barlyǵy kirmeıtin kommertsııalyq emes uıym. Sondaı-aq, bul eldegi avtokólik óndirýshiler men jınaýshylardyń jalǵyz birlestigi emes.
«Osylaısha, IIDM jáne QABQ Ónerkásipti damytý qory tarapynan qaýymdastyq músheleri bolyp tabylatyn avtoóndirýshilerdiń múddelerine basymdyq berý quqyǵy berilgen, bul olar úshin artyqshylyqty jaǵdaı jáne jalpy básekelestermen salystyrǵanda qolaısyz / dıskrımınatsııalyq qyzmet jaǵdaıyn qalyptastyrady», dep málimdedi agenttik.
Vedomstvonyń túsindirýinshe, avtoóndirýshilerge lızıngti qarjylandyrý boıynsha qarajat bólý kezinde ashyqtyqtyń bolmaýy, jeke kásipkerlik sýbektileriniń basym jaǵdaıyn belgileý faktileri, lızıng alatyn avtoóndirýshilerdi tańdaý kezindegi shekteýler – osy máseleler 2021 jyldyń qyrkúıeginde Nur-Sultan qalasy boıynsha monopolııaǵa qarsy departament janyndaǵy kedergiler jónindegi keńes otyrysynda kóterilgen.
«Qazaqstan Respýblıkasynyń Básekelestikti qorǵaý salasyndaǵy zańnamasynyń buzylýy týraly málimetterdi taldaý nátıjeleri boıynsha QR Kásipkerlik kodeksiniń 163-babynyń 4-tarmaǵyna sáıkes IIDM jáne Ónerkásipti damytý qorynyń atyna básekelestikti qamtamasyz etýge baǵyttalǵan is-áreketter jasaý týraly nusqama engizildi, atap aıtqanda –básekelestikti shekteıtin normalardy alyp tastaý. Nusqama 2021 jyldyń 30 qarashasyna deıin oryndalýǵa tıis», delingen habarlamada.
