Avtonesıe: Alǵashqy lekke kirgen 761 ótinimniń keıbiri keri qaıtarylýy múmkin
ASTANA. QazAqparat – 4 paıyzdyq avtonesıeniń alǵashqy legine kirgen 761 ótinimniń keıbiri keri qaıtarylýy múmkin. Bul jaıynda «Ónerkásipti damytý qory» AQ basqarma tóraǵasynyń orynbasary Janar Ibrasheva BAQ ókilderimen ótken brıfıngide aıtty, dep habarlaıdy QazAqparat tilshisi.
«Jeńildetilgen avtonesıe resimdeýdiń alǵashqy legine tirkelip úlgergen 761 adamnyń keıbiriniń ótinishi keri qaıtarylýy múmkin. Óıtkeni keıbir azamattar júıeniń shynymen jumys istep turǵanyn tekserý úshin nemese qalaı istep turǵanyn tekserý úshin kirgen bolýy múmkin. Keıbir adamdardyń tólem qabiletteri rastalmaýy múmkin. Osy sebepti keıbir azamattardyń ótinimi tirkelgenimen nesıe resýimdeýden bas tartylýy yqtımal. Ondaı adamdar nesıe alǵandar tizimine kirmeıdi. ıAǵnı, kelesi aıda platforma ashylǵanda qaıta kezekke tura alady, Al olardyń ornyna basqa ótinim alynbaıdy», - dedi Janar Ibrasheva.
Sondaı-aq, ol alǵashqy lekke ilesip, keıin ótinishi qanaǵattandyrylmaǵan azamattar kelesi joly ótinimdi qaıtadan basynan bastap resimdeıtinin eskertti.
«Bul kelesi aıda olar avtomatty túrde yqtımal 100 adamnyń tizimne kiredi degen sóz emes. Osy jolǵydaı qaıtadan basynan bastap ótinim resimdeıdi», - dedi ol.
Buǵan deıin «Ónerkásipti damytý qorynyń» baspasóz qyzmeti 4 paıyzdyq avtonesıege ótinim berý nege tym erte toqtatylǵanyn túsindirgen bolatyn.
